बाँके माघ ११ गते ।
मुख्य निर्वाचन अधिकृतको कार्यालयले निर्वाचन चिह्न वितरण गरेसँगै बाँकेमा प्रतिनिधिसभा उम्मेदवारहरू चुनावी प्रचार–प्रसारमा सक्रिय भएका छन् । विभिन्न राजनीतिक दल तथा स्वतन्त्र उम्मेदवारहरूले घरदैलो कार्यक्रमलाई प्राथमिकतामा राख्दै औपचारिक रूपमा प्रचार अभियान सुरु गरेका छन् ।
स्थानीय मतदाताहरूका अनुसार यस पटक बाँके निर्वाचन क्षेत्र नं. १ र २ दुवैमा पुराना उम्मेदवारहरूलाई नयाँ उम्मेदवारहरूले कडा चुनौती दिने देखिएको छ । बाँके क्षेत्र नं. १ मा नेकपा एमालेका तर्फबाट उम्मेदवार बनेका निवर्तमान सांसद सूर्य ढकाललाई नेपाली कांग्रेसका नारायण गौडेल, नेपाल कम्युनिस्ट पार्टीका नरेन्द्र पाण्डे र राष्ट्रिय स्वतन्त्र पार्टीका सुरेश चौधरीले कडा टक्कर दिने आंकलन गरिएको छ । गौडेल नेपाली कांग्रेस बाँकेका सभापति हुन् भने पाण्डे नेकपाका बाँके संयोजक हुन् । दुवै नेताको क्षेत्रमा राम्रो राजनीतिक पकड रहेको स्थानीयको भनाइ छ । गत निर्वाचनमा नागरिक उन्मुक्ति पार्टीबाट उम्मेदवारी दिएर उल्लेख्य मत ल्याएका चौधरी यस पटक राष्ट्रिय स्वतन्त्र पार्टीबाट चुनावी मैदानमा उत्रिएका छन् ।
कोहलपुरका स्थानीय मतदाताका अनुसार यस पटक एमाले उम्मेदवार ढकालका लागि चुनाव गत निर्वाचनजस्तो सहज देखिँदैन । “कांग्रेस, नेकपा र रास्वपाका उम्मेदवारहरू बलिया देखिएकाले प्रतिस्पर्धा निकै रोचक हुने सम्भावना छ,” उनले भने । क्षेत्र नं. १ मा यस पटक १६ जना उम्मेदवार चुनावी प्रतिस्पर्धामा छन् ।
त्यसैगरी बाँके क्षेत्र नं. २ मा पनि पुराना र नयाँ उम्मेदवारबीच कडा प्रतिस्पर्धा हुने अनुमान गरिएको छ । दुई पटक सांसद तथा तीन पटक मन्त्री भइसकेका मोहम्मद इस्तियाक राईलाई यस पटक नेकपा एमालेले उम्मेदवार बनाएको छ । यस क्षेत्रमा पनि विभिन्न दलका नयाँ अनुहारहरूले राईलाई चुनौती दिने संकेत देखिएको स्थानीयहरूको भनाइ छ ।
नेपालगन्ज उपमहानगरपालिकाका नगर उपप्रमुख कमरुद्दिन राई इस्तियाकका लागि भारी पर्ने देखिएको छ । माघ ४ गते उपप्रमुखबाट राजिनामा दिएर संघीय सांसदको यात्रा गरेका कमरुद्दिन नेपालगन्जमा लोकप्रिय छन् । मधेशका मुद्दालाई कमरुद्दिनले सहि ढंगले उठाउने स्थानीयले बिश्वास गरेका छन् ।
Discussion about this post