बाँके माघ ११ गते ।
बाँकेमा प्रतिनिधिसभा सदस्यका तीनवटै निर्वाचन क्षेत्रका लागि ५६ जनाको उम्मेदवारी कायम भएको छ।
मुख्य निर्वाचन अधिकृतको कार्यालय बाँकेका अनुसार सुरुमा ६० जनाले उम्मेदवारी दर्ता गराएका थिए। तीमध्ये चार जनाले उम्मेदवारी फिर्ता लिएपछि ५६ जनाको उम्मेदवारी कायम भएको हो।
बाँके क्षेत्र नम्बर १ र २ मा चार जनाले उम्मेदवारी फिर्ता लिँदा क्षेत्र नम्बर ३ मा मनोनयन दर्ता गराएका कसैले पनि उम्मेदवारी फिर्ता लिएनन्।
मुख्य निर्वाचन अधिकृत दीपककुमार दाहालका अनुसार क्षेत्र नम्बर १ मा १४ जना, क्षेत्र नम्बर २ मा २० जना र क्षेत्र नम्बर ३ मा २२ जनाको उम्मेदवारी कायम भएको छ।
उनका अनुसार क्षेत्र नम्बर १ बाट प्रदीप पौडेल र दीपकबहादुर शाहीले उम्मेदवारी फिर्ता लिएका छन् भने क्षेत्र नम्बर २ बाट सरस्वतीप्रसाद बर्मा र विजयकुमार गुप्ताले नाम फिर्ता लिएका छन्।
जिल्लामा उम्मेदवारी अन्तिम भएपछि उम्मेदवारहरू प्रचार–प्रसारमा सक्रिय भएका छन्। मुख्य निर्वाचन अधिकृत दाहालले सबै उम्मेदवार तथा राजनीतिक दलहरूलाई निर्वाचन आचारसंहिताको कडाइका साथ पालना गर्न आग्रह गरिएको जानकारी दिए। आचारसंहिता उल्लङ्घन गरेको पाइएमा कानुनअनुसार कारबाही गरिने उनले स्पष्ट पारे।
यसैबीच विभिन्न राजनीतिक दलका उम्मेदवारहरूले शनिबारदेखि जनसम्पर्क तथा प्रचार–प्रसार अभियान सुरु गरेको जनाएका छन्।
Discussion about this post