काठमाडौं फागुन २२ गते।
प्रतिनिधिसभा सदस्य निर्वाचनका दिन देशबाट एक हजारभन्दा बढी यात्रु विदेशिएका छन्। त्रिभुवन अन्तर्राष्ट्रिय विमानस्थल कार्यालयका अनुसार बिहीबार मतदानका दिन स्वदेशी तथा विदेशी गरी कुल एक हजार ८३५ यात्रु अन्तर्राष्ट्रिय उडानमार्फत बाहिरिएका हुन्।
विमानस्थलका सूचना अधिकारी तेजबहादुर पौड्यालका अनुसार सो दिन अन्तर्राष्ट्रिय उडानतर्फ २० वटा उडान र १९ वटा अवतरण भएका थिए। उनले मतदानका कारण आन्तरिक उडान लगभग ठप्प भए पनि अन्तर्राष्ट्रिय उडान भने पश्चिम एसियामा जारी सङ्कटबाहेक अन्य गन्तव्यतर्फ सञ्चालन भएको जानकारी दिए।
“मतदानका कारण आन्तरिक उडानमा यात्रुको चाप कम रह्यो र सवारी आवागमनमा पनि असहजता भयो,” उनले भने, “तर अन्तर्राष्ट्रिय उडानतर्फ भने यात्रुले सेवा लिएका छन्।”
पछिल्लो समय अन्तर्राष्ट्रिय क्षेत्रमा दैनिक करिब एक सय उडान तथा आन्तरिकतर्फ करिब २५० उडान हुँदै आएको भए पनि बिहीबार आन्तरिक उडान अत्यन्त न्यून भएको थियो। आन्तरिकतर्फ नेपाल वायुसेवा निगमले भोजपुर र श्री एयरलाइन्सले सुर्खेतबाट एक–एक गरी दुई वटा मात्र उडान सञ्चालन गरेका थिए।
विमानस्थल कार्यालयका अनुसार पश्चिम एसियाली मुलुकतर्फको हवाई उडान प्रभावित भएपछि ट्रान्जिटमा रोकिएका यात्रुलाई सेवा दिन केही उडान पुनः सुरु गरिएको छ। फ्लाई दुबई र एयर अरेबियाले नेपाल आउने उडानमा ट्रान्जिट यात्रु ल्याउने तथा नेपालमा रोकिएका यात्रुलाई गन्तव्यतर्फ लैजान थालेका छन्। बुधबार दुवै वायुसेवा कम्पनीले नेपालमा एक–एक उडान गरेका थिए।
त्यस्तै कतार एयरवेजले युरोपका विभिन्न देशमा अलपत्र परेका यात्रुको उद्धार उडान सञ्चालन गर्ने जनाएको छ। हाल नेपालमा दैनिक तीन उडान गर्दै आएको उक्त कम्पनीले सार्वजनिक गरेको उद्धार उडानको सूचीमा नेपाल भने समावेश छैन। कम्पनीका दुई वटा ठूला जहाज भने फागुन १६ देखि काठमाडौँमै रोकिएका छन्।
पश्चिम एसियाली क्षेत्रमा चर्किएको युद्ध र केही हवाईक्षेत्र बन्द भएका कारण जजिरा, कुवेत एयरवेज, एयर अरेबिया, फ्लाई दुबई, नेपाल वायुसेवा निगम, कतार एयरवेज र हिमालय एयरलाइन्सका मध्यपूर्व गन्तव्यका उडानहरू पछिल्ला दिनमा निरन्तर रद्द हुँदै आएका छन्।
Discussion about this post