प्रदेश दुईमा राष्ट्रियसभा सदस्यको निर्वाचन शुरु, मुख्यमन्त्री राउतले गरे मतदान

जनकपुरधाम माघ ९ गते ।
राष्ट्रियसभा सदस्यको ४ सीटका लागि प्रदेश दुईमा मतदान शुरु भएको छ ।
प्रदेश दुईको अस्थायी राजधानी जनकपुरधामस्थित महेन्द्र नारायण निधि सांस्कृतिक केन्द्रमा राष्ट्रियसभाको निर्वाचन शुरु भएको हो । प्रदेश २ का मुख्यमन्त्री लालबाबु राउतले सबैभन्दा पहिले मतदान गरेपछि मतदान प्रकृया शुरु भएको हो ।
प्रदेश दुईका प्रदेशसभा सदस्य र पालिकाका अध्यक्ष तथा उपाध्यक्षहरुका लागि सोही भवनमा दुईवटा मतदान केन्द्र तोकिएको छ । प्रदेशसभा सदस्य १ सय ७ जना र स्थानीय तहका नगरप्रमुख, उपप्रमुख, गाउँपालिका अध्यक्ष र उपाध्यक्ष २ सय ७२ जना गरी कूल ३ सय ७९ जना मतदाताले मतदान गर्नेछन् ।

बिहान १० बजेदेखि शुरु भएको मतदान दिउँसो ४ बजेसम्म चल्ने छ ।
दुबै मतदान केन्द्रका लागि मतदान अधिकृतका अतिरिक्त ८ जना कर्मचारी खटाइएको निर्वाचन अधिकृत राजुकुमार खतिवडाले जानकारी दिएका छन् ।
त्यस्तै मतदान स्थलमा मतदान पूर्व,मतदानको दिनमा र मतदान पश्चात तिन चरणमा गरि एकिकृत सुरक्षा योजना अन्तर्गत सुरक्षाकर्मीहरु पनि उल्लेख्य संख्यामा खटाइएको धनुषाका प्रमुख जिल्ला अधिकारी प्रदिप राज कणेलले जानकारी दिए ।

प्रदेश २ मा राष्ट्रियसभा सदस्यको चार पदका लागि भइरहेको निर्वाचनमा नेपाल कम्युनिष्ट पार्टी (नेकपा) सँग राष्ट्रिय जनता पार्टी नेपाल राजपा र नेपाली काँग्रेससँग समाजवादी पार्टीले गठबन्धन बनाएर आ-आफ्नो उम्मेदवारलाई चुनावी मैदानमा उतारेका छन्। महिला एकपदको लागि हुने निर्वाचनमा नेकपाको तर्फबाट तुलसाकुमारी दाहाल र नेपाली काँग्रेसको तर्फबाट नगिना यादव,दलित एक पदका लागि हुने चुनावको लागि नेकपाको तर्फबाट राधेश्याम पासवान र समाजवादी पार्टीको तर्फबाट रामपृत पासवान प्रतिष्पर्धामा छन् भने अल्पसंख्यक १ पदका लागि नेपाली कांग्रेसबाट भोला पंजियार र राजपाबाट शेखरकुमार सिंहले उम्मेदवारी दिएका छन् । त्यसातै अन्य एक पदका लागि हुने निर्वाचनमा समाजवादीका अनिरुद्धकुमार सिंह र राजपाका मृगेन्द्रकुमार सिंहबिच प्रतिस्पर्धा हुने छ ।
प्रदेश २ मा नेकपाको ३२ प्रदेशसभा सदस्य र ८३ स्थानीय तहका प्रमुख/उपप्रमुख गरी जम्मा १ सय १५ मतदाता छन् भने राजपाको २५ प्रदेशसभा सदस्य र ५४ नगरप्रमुख/ उपप्रमुख गरी ७९ जना छन् ।
नेकपा र राजपा गठबन्धनको कुल मतदाता संख्या १ सय ९४ रहेको छ ।
त्यस्तै नेपाली कांग्रेसको १९ प्रदेशसभा सदस्य र ८१ स्थानीय तहका प्रमुख/उपप्रमुख गरी १ सय मतदाता छन् भने समाजवादीको ३० जना प्रदेशसभा सदस्य तथा ५२ स्थानीय तहका प्रमुख/ उपप्रमुख गरी जम्मा ८२ जना मतदाता छन्। कांग्रेस र समाजवादी गठबन्धनको जम्मा मतदाता १ सय ८२ छन् ।
मतदान सम्पन्न भएपछि राजनीतिक दलहरूको सहमतिमा मतगणना समेत आजै हुनेछ ।