खोजखबर संवाददाता
बाँके साउन २४ गते । पत्रकारको अनुरोधमा ध्रुबतारा पब्लिक फार्मेसी प्रा.लि.ले शुक्रबारदेखि सर्वसाधारणलाई सबै प्रकारको औषधीमा १० प्रतिशत छुट दिने घोषणा गरेको छ । औषधीमा सर्वसाधारणलाई १० प्रतिशत छुट दिने घोषणा गर्नु नेपालमैं यो पहिलो पटक भउको जनाईएको छ । ध्रुबतारा पब्लिक फार्मेसी प्रा.लि.ले शुक्रबार आयोजना गरेको औपचारिक कार्यक्रममा औषधी व्यवसायी संघका अध्यक्ष अभय बस्नेतले संघको नीति नियमको बिरुद्ध कुनै पनि औषधी पसलले सर्वसाधारणलाई छुट दिए कारवाही गर्ने तथा त्यस्ता औषधी पसललाई सप्लाई नदिने धम्की दिंदै भाषण गरेपछि कार्यक्रममा सहभागि भएका सबैले सो कुराको चर्को स्वरमा विरोध गरेका थिए । कार्यक्रमका प्रमुख अतिथि नेपालगन्ज उपमहानगरपालिकाका मेयर डा. धवल सम्सेर राणाले जनताले छुट पाउनु भनेको जनप्रतिनिधिका लागि खुशीको कुरा भएको बताए ।
जनताले छुट पाउने कुरामा कोही कसैले विरोध गर्नु उपयुक्त नहुने जनाउँदै उनले सर्वसाधारणलाई औषधीमा छुट दिनु स्वागत योग्य कार्य भएको बताए । राष्ट्रिय अनलाइन पत्रकार संघ (नोजा) प्रदेश नं. ५ का अध्यक्ष एवम् वरिष्ठ पत्रकार उदयसिंह श्रेष्ठले आफ्नो मन्तब्य राख्ने क्रममा औषधी व्यवसायी संघका अध्यक्षको धम्कीको चर्को स्वरमा विरोध गरेका थिए ।
उनले भने– ‘पहुँच हुनेले मात्र छुट पाउने अनि सर्वसाधारणले किन छुट नपाउने ? सर्वसाधारणले पाउने छुटको विषयमा कही कतैबाट कसैले पनि विरोध गर्छ भने विरोध गर्ने गिरोहको विरोधमा जनता अब सडकमा उत्रिनु जरुरी छ ।’ उक्त कार्यक्रममा विशिष्ट अतिथि नेपालगन्ज उद्योग वाणिज्य संघका अध्यक्ष नन्दलाल बैश्यले भने–‘नेपाल सरकारले सिण्डिकेट प्रथा हटाउन लागेको अवस्थामा औषधीमा पनि सिण्डिकेट प्रथा पनि अन्त्य हुनुपर्छ । जनताले छुट पाउँदा कसैलाई पनि टाउको दुखाई हुनुहुँदैन ।’ शुक्रबारबाट सर्वसाधारणलाई सहज रुपमा औषधीमा १० प्रतिशत, सर्जिकल र सेनेटरी तर्फ २५ प्रतिशत छुट दिने व्यवस्था मिलाएसँगै अबका दिनमा आफ्नो औषधी पसलको अगाडि १० प्रतिशत छुटको बोर्ड राख्नेले छुट दिने व्यवस्था मिलाइएको छ । पत्रकारको अनुरोधमा ध्रुबतारा पब्लिक फार्मेसी प्रा.लि.ले सर्वसाधारणलाई औषधीमा छुट दिएपछि भोलिका दिनहरुमा अन्य मेडिकल स्टोरले पनि १० प्रतिशत बोर्ड राखी छुट दिने बताइएको छ ।
Discussion about this post