बाँके मंसिर ५ गते ।
बाँकेको राप्ती नदीमा बिस हजार माछाका भुरा छोडिएको छ । विश्व मत्स्य दिवसको अवसरमा मत्स्य विकास केन्द्र ओभरीद्वारा सोमबार एक कार्यक्रमका बिच राप्तीसोनारी गाउँपालिका वडा न २ स्थित राप्ती नदीमा करिब २० हजार माछाका भुरा छोडिएको हो ।
रहु र नैनी जातको माछाका भूरा छोडिएको केन्द्रका निमित्त कार्यालय प्रमुख महेन्द्र प्रसाद यादवले बताए । ”जलिय जैविक विविधता संरक्षण गरी आश्रीत समुदायको रोजगारी सुनिश्चित गरौं” भन्ने मुलनाराका साथ आयोजना गरिएको कार्यक्रममा बोल्दै यादवले माछाका महत्वपूर्ण प्रजातिको क्रमशः वंश नास भइरहेको अवस्थामा जलीय सम्पदाको संरक्षणको लागि माछाका भूरा नदीमा छोडिएको बताए । माछा मारेर छाक टर्ने समुदायको रोजगारी सुनिश्चितता प्राकृति जलाशयमा भएका माछा सकिदै जाने हुँदा माछाको संरक्षण गर्नुपर्ने र नेपालमा ८ वर्ष देखि मत्स्य दिवस मनाइदै आएको उनले बताए ।
कार्यक्रममा बोल्दै प्रमुख अथिति राप्ती सोनारी गाउँपालिका वडा नं . ८ का वडा अध्यक्ष सालिकराम डाँगीले पछिल्लो समय करेन्ट प्रवाह गरेर माछा मार्नेको संख्या बढीरहेको हुँदा यस्ता कार्यहरु रोक्न आवयक रहेको बताए । उनले जैविक विविधता संरक्षण तर्फ सबैको चासो र चिन्ता हुनुपर्ने बताए । यस्तै कार्यक्रममा बोल्दै भेटेनरी अस्पताल तथा पशु सेवा विज्ञ केन्द्र बाँकेकी प्रमुख कमला अधिकारीले कतिपय समुदाय जलचरमा अश्रीत भएको हुँदा ति जलचरहरुको संरक्षण गर्नुपर्ने बताइन् । उनले नेपाल सरकारले सिफारिस गरेका ८ प्रकारका माछा बाहेक अन्य जातका माछाहरु मार्नबाट रोक्का लागी प्रहरी प्रशासनको ध्यानाकर्षण गराईन् । सिफारिसका माछाहरु मात्र पालन गर्नुपर्नेमा उनको जोड थियो ।
कार्यक्रममा बोल्दै बर्दियाका किसान कृपाराम चौधरीले २०४६ सालदेखि ८ बिगाह जमिनमा पोखरी निमार्ण गरी हालसम्म माछा पालन गर्दै आएको र अरुलाइ माछा पाल्ने प्रेरणा दिएको बताए । उनले माछा सेवनले स्वास्थ राम्रो हुने हुँदा सबैलाइ माछा पालन गर्न सुझाव दिए । उनले किसानहरुलाई माछाका भुरा सहज रुपमा उपलब्ध गराइदिन केन्द्रलाई अनुरोध समेत गरे । सो अवसरमा नियिमित रुपमा माछा मार्ने छविलाल घर्ती ,राम बहादुर थारुलाइ जाल हस्तान्तरण गरिएको थियो ।
कार्यक्रममा राप्तीसोनारी गाउँपालिका पशुसेवा शाखा प्रमुख जय बहादुर कार्की, कचनापुर महादेवपुरी खानेपानी तथा सरसफाइ समिति अध्यक्ष शेर जंग गौतम, नेपाल रेडक्रस सोसाइटी कचनापुर शाखा अध्यक्ष अमर वली, उद्योग वाणिज्य संघ राप्तीसोनारी अध्यक्ष टिकाराम ढुंगाना, उपाध्यक्ष झुप बहादुर विष्ट, राप्तीसोनारी गाउँपालिका वडा न ८ का वडा सचिव रोशन कुमार वली, प्रहरी अधिकारी, माछापालक किसानलगायतको सहभागीता थियो ।
Discussion about this post