बाँके मंसिर १३ गते ।
बाँकेमा सशस्त्र प्रहरीको भूमिका प्रभावकारी नहुँदा भारतबाट हुने तस्करी रोकिनुको सट्टा झनै बढेको छ । नेपालगन्जको जमुनाह नाकामा कडाई गरिएपनि अन्य सहायक नाकाहरुबाट तस्करी मौलाउँदो छ । सरकारले दिएको दायित्व सशस्त्र प्रहरीले निर्वाह गर्न नसक्दा तस्करी रोकिनुको साटो मौलाउँदै गएको हो ।
सीमामा खटिएका सशस्त्र प्रहरीहरु अवैध तस्करी नियन्त्रण गर्न तदारुकता देखाउनुको साटो तस्करसँग साठगाँठ गरि रकम असुल्नमै तल्लिन भएको प्रत्यक्षदर्शी बताउँछन् ।
अवैध तस्करी नियन्त्रणको जिम्मा लिएको सशस्त्र प्रहरीले मुख्य जमुनाहनाकामा कडाई गरेको देखाउँदै सहायक नाकाबाट खुलेआम तस्करी गराउँदै आएको छ । सशस्त्र प्रहरीले तस्करहरुसँग लाइन लिएर अन्य सहायक नाकाहरुबाट खुलेआम तस्करी गराउँदै आएको भिडियो अनलाइन खोजखवरसँग सुरक्षित छ ।
यसमा सशस्त्रका घुमुवा असई सोमराज शर्माले भूमिका निभाइरहेका छन् । उनले तस्करी नियन्त्रणका लागि सशस्त्र प्रहरीका लागि सुराकी गर्नुभन्दा तस्करका लागि सुराकी गर्दै आएको स्वयम सशस्त्र प्रहरीकै जुनियर अधिकृत बताउँछन् । ‘एक जना सशस्त्र प्रहरीका अधिकृत स्तरका कर्मचारी भन्छन्, ‘सोमराजले सशस्त्र प्रहरीको भूमिका भन्दा तस्करलाई सूचना दिन्छन् । उनकै सुचनाको आधारमा तस्करले सहजरुपमा अवैध सामान भित्र्याउन सकेका छन् ।
सशस्त्र प्रहरी बल नम्बर ३० गण बागेश्वरी बाँकेबाट खटिएका सोमराजले सबैलाई लाइन मिलाएको उनको भनाई छ । एसपीका विश्वासपात्र भएकै कारण उनले असुलीधन्दालाई व्यापक बनाएको सुचना प्राप्त भएको छ ।
सशस्त्र प्रहरीले नाकामा खुलिआम असुलीधन्दा मच्चाउँदा बाँकेका सिडिओ भने सामाजिक संजाल फेसबुकमा भौकालमात्र मच्चाइरहेका छन् । तस्करी नियन्त्रण गर्ने, बजार अनुगमन गर्ने लगायतका फेसबुके स्टाटस लेख्दै भौकाल मच्चाउने उनले आफ्नै मातहतका सुरक्षा निकायले असुलीधन्दा मच्चाउँदा पनि कारवाहीको दायरामा ल्याउन सकेका छैनन् ।
सशस्त्र प्रहरीले नाकामा विपन्न तथा गरिव मानिसको सामान पक्राउ गर्ने गरेको छ । घरासयी कामका लागि मानिसले ल्याउने थोरै सामानहरु सशस्त्रले खोसेर नाकामा कडाई गरेको नाटक गरिरहेको छ । निमुखा जनताको सामान खोसेर जम्मा गर्दै आएको सशस्त्रले त्यही सामान तस्करको हो भन्दै सार्वजनिक गर्दै आएको छ ।
निमुखा जनताको सामान खोसेर एककठा गरि ठूलो परिमाणमा अवैध सामान नियन्त्रणमा लिएको मिडियावाजी गर्दै आएको सर्वसाधारण बताउँछन् । ‘सर्वसाधारणलाई त्रसित बनाएर नियन्त्रणमा लिएको सामानलाई तस्करबाट ठूलो परिमाणमा अवैध सामान बरामद गरेको भौकाल मच्चाउँदै आएको छ,’ एक प्रत्यक्षदर्शीले भने ।
तर, सशस्त्र प्रहरीकै तल्लोतहका कर्मचारी भने ठूलो परिमाणमा अवैध सामान समाउने अवस्था अहिलेसम्म नआएको बताउँछन् । उनीहरुले ठूलो सामान सेटिङमा भित्र्याउने भएकाले पक्राउ पर्ने सम्भावना नहुने बताउँछन् ।
बाँकेमा एसपी र डिआइजीका आ–आफ्नै घुमुवा छन् । एसपीका घुमुवा असई शर्मा, विष्णु थारु र डिले अधिकारी हुन् भने डिआइजीका घुमुवा दुई छन् । विगतमा पनि उनीहरु घुमुवा भएर नाकामा खटिएका सशस्त्र प्रहरी हुन् । उनीहरु असुलीधन्दामा चर्चा कमाएका सशस्त्र प्रहरीका कर्मचारी हुन् । उनीहरु सेटिङका विज्ञ भएकै कारण एसपीदेखि डिआइजीसम्मले प्रयोग गर्दै आएको सशस्त्र प्रहरीमा चर्चा छ । यहाँसम्मकी सशस्त्रका घुमुवा तस्करका नातेदार समेत पर्ने गरेका कारण सेटिङ मिलाउन उनीहरुलाई सहज भएको सशस्त्र प्रहरीमा व्यापक चर्चा छ ।
तरस्करहरुले नेपालबाट भारततर्फ पनि सामान लैजाने गरेका छन् । नेपालबाट केराउ, जडिबुटी, सुपारी लगायतका सामान भारत लैजाने गरेको पाइन्छ । जाउआउका लागि पाँच सयदेखि एक हजार रुपैयाँ ड्यूटीमा रहेका सशस्त्रलाई बुझाउने गरेको तस्करहरु स्वयम बताउँछन् । एसपीदेखि बिओपी इन्चार्जलाई महिनावारी लाखौं रुपैयाँ बुझाउने गरेको उनीहरुको भनाई छ ।
भारतबाट तस्करी गरि ल्याइएको सामान चर्को मूल्यमा बाँकेसहित बर्दिया, सुर्खेत, जुम्ला, दाङ काठमाडौं लगायतका पहाडी जिल्लाहरुमा सप्लाई हुने गरेको छ । जसका कारण राज्य कोषमा जम्मा हुने ठूलो रकम सशस्त्र र तस्करको पोल्टामा जाने गरेको छ ।
भारतबाट नेपाल सामान छिराउन तस्करहरुले भारतीय एसएसबी र पुलिसलाई समेत महिनावारी लाखौं रुपैयाँ बुझाउने गरेको स्रोत बताउँछ । सशस्त्र प्रहरी र भन्सार कर्मचारीको मिलेमतोमा हुने अवैध तस्करी रोक्न गृहमन्त्री नारायणकाजी श्रेष्ठको प्रभावकारी भूमिका नदेखिएको सर्वसाधारणको बुझाई छ । सशस्त्र प्रहरीको अवैध असुलीबारे संचार माध्यममा छ्यापछ्याप्ती समाचार आउँदा समेत गृह प्रशासन मौन बस्नुले शंका उब्जिएको छ ।
पछिल्लो समयमा सशस्त्र प्रहरीका बोर्डर आउट पोष्ट (बिओपी) थप्ने क्रम जारी नै छ । बाँकेमा मात्रै ८ वटा यस्ता पोष्टहरु छन् । रात दिन गस्ती भइरहेको पनि सशस्त्र बताउँछ । तर उनीहरुको गस्ती भने तस्करको सुरक्षाका लागि हुने गरेको देखिएको छ । सशस्त्र प्रहरी राज्यप्रति असहयोगी र तस्करमैत्री बन्दा राजस्व संकलन खस्किएको छ ।
नेपाल–भारत सीमा अन्तरगत बाँकेको खडैचा, हिरमिनिया कालाबन्जार, भज्जुपुरुवा, नयाँ वस्ती, जमुनाह, जयसपुर इच्छाराम बाबा मन्दिर पछाडीको भाग, पचपोखरा, साईगाउँ, बढैया, सैनिक लगायतका सहायक नाका चोरी तस्करीका लागि प्रमुख सहायक नाका मानिन्छन् । मुख्य नाकामा कडाई गरेर सशस्त्र प्रहरीले यी सहायक नाकाबाट तस्करसँग मिलेर अवैध सामान भित्र्याउन सहयोग गर्दै आएको छ । यस विषयमा सरोकारवाला निकायले बेलैमा ध्यान नदिए राज्यलाई करोडौ रुपैयाँ नोक्सान हुने निश्चित छ ।
Discussion about this post