बाँके साउन ७ गते ।
‘नाइरोबी फ्लाई’ किराबाट निस्कने कडा एसिडको संक्रमणबाट अस्पताल आउने बिरामीको संख्या बढ्दै गएको छ । बाँकेको नेपालगन्जसहित ग्रामीण क्षेत्रमा ‘नाइरोबी फ्लाई’ कीराको सङ्क्रमणबाट छालामा फोका उठ्ने र पाक्ने समस्या बढ्न थालेको हो ।
भेरी अस्पताल नेपालगन्जका यौन तथा छाला रोग विशेषज्ञ डा. अस्मिता गौतमले वर्षायाममा देखिने यस कीराले छोएका व्यक्तिको छालामा फोका उठ्ने र पाक्ने समस्या देखिने बताइन् । उनले भनिन्,“अहिले ‘नाइरोबी फ्लाई’ कीराको सङ्क्रमणबाट रोगका बिरामीहरु भेरी अस्पतालमा दैनिकजसो आउन थालेको बताइन् । उनले ‘नाइरोबी फ्लाई’ कीराको सङ्क्रमण भएका बिरामीसँगै शरीर चिलाउने, बच्चाहरूमा पिलो, घमौरा, छालामा सङ्क्रमणलगायतका बिरामीहरु अस्पताल आउने क्रम बढिरहेको जानकारी दिइन् ।
भेरी अस्पतालमा अहिले दैनिक ८ देखि १० जना ‘नाइरोबी फ्लाई’ कीराको सङ्क्रमण भएका र ७० देखि ८० जनामा अन्य छाला रोगसम्बन्धी बिरामीको जाँच भइरहेको अस्पतालका छालारोग विशेषज्ञ डा. गौतमले बताए । उनले थपे, “अत्यधिक गर्मीकै बिच केही दिन लगातार परेको वर्षाले जिल्लामा मनसुनजन्य रोगको सङ्क्रमण बढेको छ । ‘नाइरोबी फ्लाई’ कीराको सङ्क्रमण पनि तीव्र रुपमा बढेको छ ।”
‘नाइरोबी फ्लाई’ कीराले छोएपछि निस्किने एकप्रकारको रसायनले मानिसको छालामा फोका हुने र पाक्ने गरेकाले सो कीराको सम्पर्कबाट जोगिन चिकित्सकहरुले सुझाव दिएका छन् ।
कीराको सम्पर्कबाट जोगिन बाहुला भएको सर्ट र पाइन्ट लगाएर शरीरलाई ढाक्ने, कीराले छोएको ठाउँको छालालाई धुने र सङ्क्रमण भएमा चिकित्सकको सल्लाह अनुसार औषधिको प्रयोग गर्नुपर्ने डा. गौतमले बताए । खासगरी बेलुकाको समयमा बत्ती बलेको ठाउँमा यो कीरा आउने गरेकाले सतर्क रहन उनले आग्रह गरे ।
Discussion about this post