बाँके साउन २४ गते ।
सरकारले देशभर नै लक्ष्य अनुसारको राजस्व संकलन गर्न सकिरहेको छैन । नेपालगन्ज भन्सार कार्यालय त झन राज्यले दिएको लक्ष्यको ५ प्रतिशतमा सिमित हुन पुग्यो । यसैलाई आधार मान्ने हो भने चालू आर्थिक वर्षको साउन महिनाको लक्ष्य पनि हासिल गर्न कठिन देखिन्छ । राजस्व घट्नुका विभिन्न कारणहरु छन् । तीमध्ये एउटा कारण हो अवैध रुपमा भइरहेको तस्करी ।
तस्करी नियन्त्रणका लागि खटिएका सुरक्षा निकायहरु तस्करसँगको सेटिङमा मस्त हुँदा राज्यलाई करोडौंको घाटा भइरहेको छ । खुला सीमानाकामा सशस्त्र र नेपाल प्रहरीकै सेटिङमा अवैध धन्दा चलिरहेको प्रत्यक्षदर्शी बताउँछन् । नेपालगन्जको मुख्य नाका जमुनाहमा देखाउनका लागि कडाई गरिएको छ । तस्करहरुको समूहले सशस्त्र र नेपाल प्रहरीलाई आफ्नो प्रभावमा पारेर अवैध धन्दालाई भने निरन्तरता दिइरहेका छन् ।
जानकी गाउँपालिका, डुडुवा गाउँपालिका र नरैनापुर गाउँपालिकाका विभिन्न नाकाबाट चोरी तस्करी बढ्दो छ । विकट क्षेत्र भएकाले यहाँ जिल्लाको उच्च सुरक्षा निकायको उपस्थिति छैन । तर प्रहरीका चौकी र विओपी पोष्टहरु छन् । ति चौकीका इन्चार्ज र विओपीका इन्चार्जहरु तस्करसँग मिलेर भारतबाट अवैध रुपमा करोडौंको सामानहरु नेपाल भित्र्याउने गरेका छन् । पछिल्लो समय हिरमिनिया र साइगाउँ तस्करहरुको लागि मुख्य ट्रान्जिट नै बनेको छ । यता तिर न पत्रकारहरुको आँखा पर्छ न त अधिकारकर्मीको नै आँखा पर्छ । त्यसैले पनि प्रहरीका इन्चार्जहरुलाई कमाउ धन्दाका लागि सहज र सुरक्षित भएको छ । 
प्रहरी चौकी साइगाउँको आगनबाटै तस्करी भइरहेको स्थानीय बताउँछन् । साइगाउँका प्रहरी इन्चार्जमा विष्णु शाही छन् । तर तस्करहरुले मोटरसाइकल र साइकलमार्फत यही प्रहरी चौकीको आगनबाट भन्सार छलिको करोडौंको सामान भित्र्याइरहेका छन् । इन्चार्ज शाहीले प्रहरी जवान विनोद केसीलाई घुमुवाका रुपमा खटाएका छन् । तस्करसँगको मिलेमत्तोमा रकम असुलीका घटनामा इन्चार्ज शाही मुछिन थालेपछि उनले घुमुवाका रुपमा जवान केसीलाई प्रयोग गरेका छन् । प्रहरी स्रोतले भन्यो,“उनै केसीले तस्करसँग रकम उठाउँछन् । र, इन्चार्ज शाहीलाई बुझाउने गरेका छन् ।
अनलाइन खोजखवरको सम्पर्कमा आएका केही तस्करहरुले इन्चार्ज शाहीले आफुलाई भन्दा पनि केसीमार्फत काम मिलाउन भन्ने गरेका छन्। यसअघि इन्चार्ज शाहीले तस्करसँग आफै रकम बुझ्ने गरेको बताइएको छ । ‘रात दिननै साइकल र मोटरसाइकलमा तस्कर भइरहेको छ स्थानीय भन्छन्–‘पुलिसको सहयोगविना एक किलो चिनी ल्याउन सकिदैन अनि यसरी मोटरसाइकलका मोटरसाइकल भारतबाट कसरी अवैध सामान आउँछ ?’ आक्रोसित हुँदै स्थानीयहरुले त्यस्ता अवैध धन्दामा मुछिएका प्रहरीहरुको विगतको आर्थिक अवस्थाबारे जाँचबुझ गर्न पनि सुझाउँछन् । ३४ हजारको जागिरले उनीहरुको फेरिदो आर्थिक हैसियतबारे पनि खोजविन जरुरी रहेको स्थानीय बताउँछन् ।
प्रहरी स्रोतका अनुसार इलाका प्रहरी कार्यालय हिरमिनियाका इन्चार्ज प्रहरी बरिष्ठ नायब निरीक्षक कमलबहादुर बुढाथोकी पनि तस्करलाई सघाउँदै आएका छन् । अहिले तस्करका लागि हिरमिनिया नाका सहज हुनुको कारण बुढाथोकीले तस्करसँग मासिक २०–२५ हजार लिनु हो । उनले रकम असुल्न प्रहरी जवान मिलन खाँडलाई सादा पोशाकमा (घुमुवा) परिचालन गरेका छन् । खाँड र बरिष्ठ सई बुढाथोकी मिलेर एक जनाबाट २० देखि २५ हजार रुपैयाँ लिइरहेको एक तस्करले अनलाइन खोजखवरलाई जानकारी दिए । ‘यी दुबै जनाको रातदिन तस्करसँग असुली गर्नमा बित्छ,’ एक प्रत्यक्षदर्शीले भने ।
जिल्ला प्रहरी कार्यालय बाँकेले नेपालगन्ज उपमहानगरपालिका–२१ बिर्ताका अरबी खाँ हत्या घटनाको अनुसन्धान गर्न प्रहरी हवल्दार अतिस खान, प्रहरी हवल्दार रामसुमन चौधरी, प्रहरी सहायक हवल्दार गंगाराम मल्ल, प्रहरी जवान बिनोद केसी र प्रहरी जवान वीरबहादुर ताउलेलाई परिचालन गरेको छ । तर, यो घुमुवा टोली अनुसन्धानका लागि सुरु सुरुमा बिर्ता पुगे पनि अहिले भने जान छोडिसकेका छन् । अनुसन्धानका लागि खटिएको प्रहरी टोली हत्या घटनाको अनुसन्धान गर्नमा भन्दा पनि हिंजोआज नाकामा भेटिन्छन् ।
विओपीका इन्चार्ज तथा प्रहरी चौकी इन्चार्जहरुसँग मिलेर घुमुवाले पनि राम्रै रजगज चलाइरहेका छन् ।
यो पनि पढ्नुहोस्
Discussion about this post