बाँके भदौ ४ गते ।
बाँकेका सर्वसाधारणले आफूलाई असुरक्षित महशुस गरेका छन् । दिनदहाडै खुकुरी प्रहारका घटना दोहिरिन थालेपछि बाँकेका सर्वसाधारणले आफूलाई असुरक्षित महशुस गरेका हुन् ।
बाँके प्रहरीले शान्ति, सुरक्षा दिन नसकेपछि यहाँका नागरिक चिन्तित बनेको नेपालगन्ज उद्योग बाणिज्य संघका पूर्व अध्यक्ष नन्दलाल बैश्यले बताए । उनले पछिल्लो समय बाँकेका सर्वसाधारण आफूलाई असुरक्षित महशुस गरेको बताए । ‘दिनदहाडै खुकुरी प्रहार र हत्याका घटना हुन थालेपछि बाँकेबासीले असुरक्षित महशुस गरेका छौँ,’ उनले भने ।
घरमा सुतिरहेका ब्यक्तिलाई लुटेराको समुहले धारिलो हतियार हिर्काउँदा जानकी गाउँपालिका–३ का एक जनाको मृत्यू भएको घटना सेलाउन नपाउँदै नेपालगन्ज उपमहानगरपालिका–२१ विर्ताका अरबी खाँको विभत्स तरिकाले हत्या भयो ।
उक्त घटना छानविनका लागि सिआइवीको टोली नेपालगन्ज आए पनि प्रहरीले अहिलेसम्म हत्यारा पक्राउ गर्न सकेको छैन ।
यी दुई ठूला घटनाको अनुसन्धानमा चुकेको बाँके प्रहरीलाई राप्तीसोनारी गाउँपालिका–५ बिनौनामा भएको खुकुरी प्रहारको घटनाले झनै चुनौती थपेको छ । विनौनामा भएको खुकुरी प्रहारको घटनामा दुई जना सख्त घाइते भएका छन् । दुवै जनाको भारतको लखनउमा उपचार भइरहेको छ ।
प्रहरीले घटनामा संलग्न भएको आरोपमा चार जनालाई पक्राउ गरे पनि कारवाहीको दायरामा ल्याउने शंका ब्यक्त गरिएको छ । ‘बाँके प्रहरी शान्ति, सुरक्षा कायम गर्न पूर्णरुपमा असफल भइसकेको छ,’ नेपालगन्ज उपमहानगरपालिका–४ गणेशपुर निवासी संविधान सभा सदस्य हाजी अब्दुल हमीद सिद्दिकी (भोला)ले भने , ‘प्रहरीबाट सुरक्षा पाइएला भन्ने आशा गर्नु बेकार छ ।’
अरबी खाँको हत्या भएको ५ महिना पुग्नै लाग्दा समेत हत्यारा पक्राउ गर्न नसकेको बाँके प्रहरीले सँधै अनुसन्धान भइरहेको छ, भन्ने रेडिमेड जवाफ दिँदै आएको छ । बाँके प्रहरीलाई घटना अनुसन्धानको बारेमा सोध्दा रेडिमेड जवाफ दिँदै भन्छ, ‘अनुसन्धान भइरहेको छ । हामी हत्यारा नजिक पुगिसकेका छौँ । केहि दिनमा हत्यारा पक्राउ गरि कारवाहीको दायरामा ल्याउँछौँ । तपाईहरु ढुक्क हुनुस हत्यारालाई छिट्टै पक्राउ गरि सार्वजनिक गर्छौँ ।’
बाँके प्रहरीले रेडिमेड जवाफ दिन लागेका ५ महिना भइसक्यो । तर घटनामा संलग्न एक जनालाई पनि पक्राउ गर्न सकेको छैन । यसले प्रहरीको कार्य कुशलतामाथि जनताले औँला उठाउन थालेका छन् ।
प्रहरीले हत्यारा पत्ता लगाउन नसकेपछि अरबी खाँका परिवारलाई थप पीडा दिएको छ । जिल्ला प्रहरी कार्यालयमा दिनदिनै बोलाएर चिन्ता नलिन भन्दै ढाडस बाहेक अरु प्रतिफल दिन सकेको छैन बाँके प्रहरीले । ‘प्रहरीको ढाडसले हाम्रो चित्त बुझ्ने कुरा हुँदैन । प्रहरीले हत्यारालाई पक्राउ गर्यो भने मात्र हाम्रो मनमा शान्ति मिल्नेछ,’ अरबी खाँकी आमा राविया खाँले भनिन् ।
अरबी खाँ घटना अनुसन्धानका लागि बाँके प्रहरीले प्रहरी हवल्दार अतिस खाँको नेतृत्वमा सादा पोशाकका प्रहरी परिचालन गरे पनि केहि हात लागेको छैन । ति सादा पोशाकका प्रहरी टोली अरबी खाँ हत्या अनुसन्धान गर्नुभन्दा नाकामा बसेर तस्करसँग हप्ता असुल्न ब्यस्त गरेकोले हत्या घटना अनुसन्धान फितलो भएको परिवारका सदस्यले गुनासो गरेका छन् ।
धारिलो हतियार प्रयोग गरि असार २८ गते राती नेपालगन्जमा एक युवकको हत्या भयो । नेपालगन्ज उपमहानगरपालिका–११ त्रिभुवन चोक नजिकै ३८ वर्षीय इरसाद राईमाथि धारिलो हतियार प्रहार गरि हत्या गरिएको एक महिना वितिसक्दा समेत प्रहरीले हत्यारा पत्ता लगाउन नसक्नु लज्जाको विषय बनेको छ । ‘बाँके प्रहरी एकपछि अर्को घटनामा चुक्दै गएको छ । पछिल्लो समय बाँके असुरक्षित बनेको छ । दिनदहाडै खुँडा, खुकुरी प्रहार हुँदासमेत प्रहरीले दोषीलाई पक्राउ गर्न नसक्दा बाँकेबासी असुरक्षित महशुस गरिरहेका छौँ,’ कोहलपुर नगरपालिका–११ का सन्तोष थापाले भने ।
यो पनि पढ्नुहोस्
यो पनि पढ्नुहोस्
पाँच महिनासम्म फेला परेनन् अरबी खाँका हत्याराः पीडित भन्छन्–‘हत्यारासँगै प्रहरी मिलेको छ’
Discussion about this post