बाँके असोज ७ गते ।
जेन जी प्रदर्शनका क्रममा भएको आगजनी तथा तोडफोडमा २७ करोड ८८ लाख रुपैयाँ बराबरको क्षति भएको नेपालगन्ज उपमहानगरपालिकाले जनाएको छ । जेन जी प्रदर्शनका क्रममा भएको आगजनीबाट कार्यालय परिसरमा रहेका सवारी साधन, कार्यालयमा रहेका फर्निचर, उपकरणका साथै विभिन्न भवनमा क्षति पुगेको नेपालगन्ज उपमहानगरका प्रमुख प्रशासकीय अधिकृत रामहरि शर्माले जानकारी दिए ।
उनले जिल्ला प्रशासन कार्यालय, नेपाल प्रहरी, कोष तथा लेखा नियन्त्रण कार्यालयका प्रतिनिधिको उपस्थितिमा जन प्रतिनिधि, सर्वसाधारण, विभिन्न राजनीतिक दलका प्रतिनिधि समेतको रोहवरमा मुचुल्का तयार पारिएको बताए ।
उनले दिएको जानकारी अनुसार, नेपालगन्ज उपमहानगरको २६ करोड ७६ लाख ८० हजार रुपैयाँ बराबरको क्षति भएको छ । नेपालगन्ज उपमहानगपालिकाको सटरमा भएको पसलको सामान जल्दा एक करोड ११ लाख ५५ हजार ८८२ रुपैयाँ बराबरको क्षति भएको प्रमुख प्रशासकीय अधिकृत शर्माले जानकारी दिए । ‘आगजनीबाट २७ करोड ८८ लाख ३६ हजार १११ रुपैयाँ बराबरको क्षति भएको छ,’ उनले भने ।
क्षति विवरण संकलन गर्न बरिष्ठ प्रशासन अधिकृत कृष्णप्रसाद जोशीको नेतृत्वमा २१ सदस्यीय मुचुल्का तयारी समिति गठन भएको थियो । उक्त समितिले क्षतिको विवरण संकलन गरि कार्यालयलाई बुझाएको उनले बताए । ‘क्षतिको विवरण संकलन भएको छ । उक्त विवरण अनुसारको मुचुल्का मंगलवार तयार गरिएको छ,’ शर्माले भने ।
Discussion about this post