बाँके फागुन १८ गते ।
आफ्ना पुर्व सभापति स्व.सुशील कोइरालाको संसदिय सिट जितेर साख फर्काउन नेपाली कांग्रेस बाँके क्षेत्र नं. २ ले जोडबल लगाएको छ ।
पुर्व प्रधानमन्त्री समेत रहेका कोइराला पछिल्लो पटक बाँके र चितवन दुई क्षेत्रबाट चुनाव लडेका थिए । चुनाव प्रचार प्रसारको अन्तिम दिन नेपाली कांग्रेस बाँके क्षेत्र नं. २ ले सोमबार शहरमा विशाल र्यालि प्रदर्शन गरेर मतदातालाई आफ्नो पक्षमा आकर्षित गर्न खोजेको छ।
नेपाली कांग्रेस बाँके क्षेत्र नं. २ का क्षेत्रीय सभापति रमेश गुप्ता भन्छन–’ हामी हरसम्भव प्रयास गरिरहेका छौं कि पटक पटक जितेको हाम्रो क्षेत्र यो पटक जितेर फर्काउँछ।’
बाँके क्षेत्र नं. २ ः भू–भाग थपघट र बदलिने विजेता’
वि.सं.२०४८ मा नेपाली कांग्रेसका सुशील कोइरालालाई १४,४०९ प्राप्त थियो ।०५१मा राप्रपाका शान्तिशम्सेर राणाले १५,७७१ मत पाएर विजयी भए वि.सं.०५६ सालमा १५,२५६ मतका साथ सुशील कोइरालाले क्षेत्रमा कमब्याक गरेका थिए । वि.सं.२०६४ को संविधान सभामा क्षेत्र थप भयो,मधेसी जन अधिकार फोरमका मो.इस्तियाक राय १९,३९६ मतका साथ स्थान सुरक्षित गरे,नेपालगन्ज शहर सहित केही भू–भाग क्षेत्र नं.३ मा पर्यो मजफोका सर्वदेव प्रसाद ओझाले १४,९०० मत सहित क्षेत्र विजयी भए,वि.सं.२०७० सालको दोस्रो संविधान सभामा सुशील कोइराला फेरी १०,७५३ मतले सुरक्षित भए,वि.सं.२०७४को संसदिय चुनावमा संघीय समाजवादी फोरमका मो.इस्तियाक राय २१,५७५ मतका साथ विजयी भएका थिए । पछिल्लो वि.सं.२०७९ को संसदीय निर्वाचनमा राप्रपाका धवलशम्शेर राणा २९,५७७ मतले विजयी भएका थिए ।
’यसपटकको चुनावमा आफ्नो बाँके क्षेत्र नं. २ मा चुनाव जित्नै पर्ने दबावमा छौं’ –बाँके कांग्रेसका कार्यवाहक सभापति गोपाल अधिकारी भन्छन् ।
बाँकेमा तीन वटा निर्वाचन क्षेत्र छन् । अनि ३ लाख ५० हजार ३ सय ७१ मतदाता छन् । १ लाख ७८ हजार १ सय ३९ पुरुष, १ लाख ७२ हजार २ सय २३ महिला सहित ९ फरक–अन्य मतदाता पनि छन् । बाँके–३ मा कुल एक लाख १७ हजार ३ सय ५४ मतदाता रहेका छन् । यो निर्वाचन क्षेत्रमा ५८ हजार ६ सय ६४ जना पुरुष र ५८ हजार ६ सय ८९ जना महिला मतदाता रहेका छन् ।
कांग्रेसले यसपटक आफ्नो संगठनको मजवुति देखाउनुपर्ने अवस्था आएको नेपाल तरुणदल नेपालगन्ज उपमहानगका सभापति सन्दिपजङ्ग शाह बताउँछन् ।
अघिल्लो चुनावमा ३ लाख ३३ हजार ९ सय ३४ मतदाता थिए, यसपटक १६ हजार ४ सय ३७ नयाँ मतदाता थपिएका हुन् । आसन्न फागुन २१ गतेको निर्वाचनको लागि १ सय ३९ मतदान स्थल, ४ सय केन्द्र सहित ३ अस्थायी केन्द्र र २ हजार ९ सय ३० अस्थायी मतदाता रहेको अवस्था छ ।
बाँके क्षेत्र नं. २ मा चुनाव केन्द्रित गतिविधिलाई व्यवस्थित गरेर संगठन अघि बढेकाले चुनाव जित्ने बताउँछन वडा नं. ६ का कांग्रेस इकाइ सभापति जमालुद्दिन वागवान ।
नेपाली कांग्रेस बाँकेको क्षेत्र नं. २ का क्षेत्रिय प्रतिनिधि एवम नेपाल तरुणदल बाँकेका सचिव विनोद रिजाल भन्छन–’जित्ने अवसर छ,यो पटक हामी पक्षमा नतिजा निकाल्छौं ।’
बाँके क्षेत्र नं. २ का मतदाताले केन्द्रमा पहुँच पुग्ने नेता खोज्छ त्यसैले सुधांशु कोइराला त्यको सहि प्रतिनिधि पात्र भएकाले चुनाव जित्ने कांग्रेस कार्यकर्ताहरुको अपेक्षा छ ।
कांग्रेसकी सक्रिय महिला नेतृ पुष्पा शुक्ला भन्छिन–’जनताले कोइराला राजनीतिक परिवारका सदस्य र सबैलाई समेटेर अघि बढ्ने व्यक्ति भएकाले जित निकाल्न सकिन्छ ।’
नेपालगन्जका उदयोगी,व्यवसायी,निजि क्षेत्र,सामाजिक कारयकर्ताहरु कोइरालाको उम्मेद्वारीका विषयमा सकारात्मक भएकाले प्रभाव बलियो पर्ने कानुन व्यवसायी लोकबहादुर शाहको आंकलन छ ।
बाँके क्षेत्र नं. २ मा यो पटकको त्रिकोणीय प्रतिष्पर्धामा कांग्रेस,नेकपा एमाले र रास्वपा नै भएको सर्वसाधारणको अड्कल छ ।
Discussion about this post