काठमाडौं चैत १२ गते ।
प्रतिनिधि सभाका ज्येष्ठ सदस्य अर्जुननरसिंह केसीले प्रतिनिधि सभाका नवनिर्वाचित २७४ जना सदस्यलाई बिहीबार पद तथा गोपनीयताको शपथ गराउने भएका छन्। उनले ज्येष्ठ सदस्यको हैसियतमा बुधबार राष्ट्रपति रामचन्द्र पौडेलबाट शपथग्रहण गरेका हुन्।
सङ्घीय संसद् सचिवालयका प्रवक्ता एकराम गिरीका अनुसार नवनिर्वाचित सदस्यहरूको शपथग्रहणका लागि आवश्यक प्राविधिक तथा व्यवस्थापकीय तयारी पूरा भइसकेको छ। शपथग्रहण कार्यक्रम चैत १२ गते बिहीबार दिउँसो २ बजे सिंहदरबारस्थित निर्माणाधीन सङ्घीय संसद् भवनको बहुउद्देश्यीय सभाकक्षमा आयोजना गरिनेछ।
शपथग्रहण प्रक्रियालाई व्यवस्थित बनाउन नवनिर्वाचित सदस्यहरूलाई कार्यक्रम सुरु हुनुभन्दा कम्तीमा दुई घण्टा अगावै सिंहदरबार उपस्थित हुन आग्रह गरिएको छ।
प्रतिनिधि सभा सदस्य निर्वाचन ऐन, २०७४ को दफा ७५ अनुसार कुनै सदस्यले प्रतिनिधि सभा वा त्यसका समितिको बैठकमा भाग लिनुअघि अध्यक्षता गर्ने व्यक्तिसमक्ष शपथ लिनुपर्ने व्यवस्था छ। सोही व्यवस्थाअनुसार ज्येष्ठ सदस्य केसीले नवनिर्वाचित सदस्यहरूलाई शपथ गराउनेछन्।
सचिवालयले नवनिर्वाचित सदस्यहरूको विवरण अभिलेखीकरणका लागि निर्वाचित भएको प्रमाणपत्रको प्रतिलिपि, नागरिकता प्रमाणपत्रको प्रतिलिपि तथा दुई प्रति फोटो बुझाउनुपर्ने जनाएको छ। साथै, आवेदन फाराम भरी बैंक खाता विवरण र व्यक्तिगत सम्पर्क नम्बर सांसद सुविधा व्यवस्थापन शाखामा उपलब्ध गराउन आग्रह गरिएको छ।
शपथग्रहणमा अनुपस्थित रहने सदस्यहरूका लागि पछि उनीहरूको अनुकूलताअनुसार ज्येष्ठ सदस्यबाटै शपथ गराउने व्यवस्था मिलाइएको छ।
यसैबीच, नवनिर्वाचित सदस्यमध्ये ५४ जनाले मातृभाषामा शपथ लिने जानकारी सचिवालयलाई दिएका छन्। प्रवक्ता गिरीका अनुसार बुधबार बेलुका ५ बजेसम्म उक्त सङ्ख्या पुगेको हो र यो अझै बढ्न सक्ने अनुमान गरिएको छ।
नेपाली बाहेक मैथिली, भोजपुरी, नेपाल भाषा, बज्जिका, रानाथारू तथा थारूलगायतका भाषामा शपथ लिने सदस्यहरूले आफ्नो रुचि अनुसारको भाषा चयन गरेका छन्।
नवयुवा पुस्ताको सहभागितामा सम्पन्न निर्वाचनबाट निर्वाचित सदस्यहरूको शपथपछि प्रतिनिधि सभाको नयाँ कार्यकाल औपचारिक रूपमा सुरु हुने छ।
Discussion about this post