बाँके, जेठ २० गते ।
नेपालगन्ज उद्योग वाणिज्य संघका पूर्वअध्यक्ष तथा वरिष्ठ व्यवसायी अब्दुल वाहिद मन्सुरी (चुन्ना) राष्ट्रिय स्वतन्त्र पार्टी (रास्वपा) मा प्रवेश गरेका छन्।
रास्वपा नेपालगन्ज नगर समितिका सभापति नवीन खड्काका अनुसार मन्सुरीले पार्टीको सदस्यता ग्रहण गर्दै औपचारिक रूपमा रास्वपाको अभियानमा आबद्ध भएका हुन्।
व्यवसाय, सामाजिक सेवा तथा सार्वजनिक जीवनमा लामो समयदेखि सक्रिय रहँदै आएका मन्सुरीको पार्टी प्रवेशले बाँकेमा रास्वपाको संगठनात्मक विस्तार तथा जनसम्पर्क अभियानलाई थप मजबुत बनाउने विश्वास पार्टीले व्यक्त गरेको छ।
नेपालगन्ज उद्योग वाणिज्य संघको नेतृत्व गरिसकेका मन्सुरी व्यवसायिक क्षेत्रका स्थापित व्यक्तित्वका रूपमा परिचित छन्। उद्योग, व्यापार तथा निजी क्षेत्रका समस्या समाधान र व्यवसायिक वातावरण सुधारका विषयमा उनले निरन्तर आवाज उठाउँदै आएका छन्।
नगर सभापति खड्काले अनुभवी व्यवसायी तथा सामाजिक व्यक्तित्वको रूपमा परिचित मन्सुरीको सहभागिताले सुशासन, पारदर्शिता र समृद्धिको अभियानलाई थप ऊर्जा प्रदान गर्ने बताए। उनले पछिल्लो समय विभिन्न पेशा, व्यवसाय तथा सामाजिक क्षेत्रसँग सम्बन्धित व्यक्तिहरू रास्वपाप्रति आकर्षित हुने क्रम बढ्दै गएको पनि उल्लेख गरे।
मन्सुरीको रास्वपा प्रवेशसँगै बाँकेको राजनीतिक तथा व्यवसायिक वृत्तमा चासो बढेको छ। उनको अनुभव, सामाजिक पहुँच र सक्रियताले आगामी दिनमा पार्टीको संगठन विस्तार तथा जनआधार सुदृढीकरणमा सकारात्मक योगदान पुग्ने अपेक्षा गरिएको छ।
Discussion about this post