बाँके, असार १२ गते।
बाँके जिल्लाका सबै आठ स्थानीय तहले आर्थिक वर्ष २०८३/०८४ का लागि वार्षिक नीति तथा कार्यक्रमअनुसार कुल ७ अर्ब १२ करोड ४८ लाख ४ हजार रुपैयाँ बराबरको बजेट सार्वजनिक गरेका छन्।
सार्वजनिक बजेटअनुसार बजेटको आकारका हिसाबले नेपालगञ्ज उपमहानगरपालिका सबैभन्दा अगाडि रहेको छ भने गाउँपालिकामध्ये राप्ती सोनारी गाउँपालिका को बजेट सबैभन्दा ठूलो रहेको छ।
नेपालगञ्ज उपमहानगरपालिकाले १ अर्ब ७६ करोड ६४ लाख ८३ हजार रुपैयाँको बजेट ल्याएको छ। त्यसपछि कोहलपुर नगरपालिकाले १ अर्ब ७ करोड ५१ लाख रुपैयाँको बजेट सार्वजनिक गरेको छ।
गाउँपालिकातर्फ राप्ती सोनारी गाउँपालिकाको बजेट ९२ करोड ९२ लाख ३९ हजार रुपैयाँ रहेको छ। त्यसपछि क्रमशः बैजनाथ गाउँपालिकाको ८१ करोड ७१ लाख ४० हजार रुपैयाँ, खजुरा गाउँपालिकाको ७८ करोड २७ लाख ९३ हजार रुपैयाँ, जानकी गाउँपालिकाको ६९ करोड ५६ लाख २९ हजार रुपैयाँ, डुडुवा गाउँपालिकाको ५६ करोड ८० लाख रुपैयाँ तथा नरैनापुर गाउँपालिकाको ४९ करोड २ लाख ८३ हजार रुपैयाँको बजेट रहेको छ।
स्थानीय तहहरूले कृषि आधुनिकीकरण, सिँचाइ विस्तार, पशुपालन प्रवद्र्धन, शिक्षा सुधार, स्वास्थ्य सेवा विस्तार, युवा स्वरोजगार, सडक तथा अन्य पूर्वाधार विकास, वातावरण संरक्षण, सामाजिक सुरक्षा र सुशासनलाई प्राथमिकतामा राख्दै बजेट विनियोजन गरेका छन्।
पालिकाहरूका अनुसार बजेट संघीय तथा प्रदेश सरकारबाट प्राप्त समानीकरण र सशर्त अनुदान, राजस्व बाँडफाँट, आन्तरिक आय तथा अन्य स्रोतलाई आधार मानेर तयार गरिएको हो।
यद्यपि बजेटको आकार बढ्दै गए पनि त्यसको प्रभावकारी कार्यान्वयन, पुँजीगत खर्चको गुणस्तर, बेरुजु नियन्त्रण तथा विकास आयोजनाको प्रभावकारिता स्थानीय तहका प्रमुख चुनौतीका रूपमा रहेको सरोकारवालाहरूको भनाइ छ।
नागरिक सरोकार मञ्च बाँकेका संयोजक कृष्णप्रसाद श्रेष्ठले विगतका वर्षहरूमा जिल्लाका स्थानीय तहमा बेरुजुको समस्या देखिएकाले आगामी वर्ष पारदर्शी, उत्तरदायी र परिणाममुखी खर्च व्यवस्थापनमा विशेष ध्यान दिनुपर्ने बताए।
त्यसैगरी नेपालगञ्जका नागरिक अगुवा हेमन्तराज काफ्लेले सार्वजनिक गरिएका बजेट प्रभावकारी रूपमा कार्यान्वयन हुन सके जिल्लाको पूर्वाधार विकास, सेवा प्रवाह, कृषि उत्पादन, शिक्षा तथा स्वास्थ्य क्षेत्रमा उल्लेखनीय सुधार आउने विश्वास व्यक्त गरे।
Discussion about this post