बाँके, असार २८ गते ।
खेलकुदले अनुशासन, सकारात्मक प्रतिस्पर्धा र सामाजिक सद्भाव विकास गर्दै स्वस्थ समाज निर्माणमा योगदान पु¥याउने वक्ताहरूले बताएका छन्।
नेपालगन्जस्थित महेन्द्र पुस्तकालयले आयोजना गरेको ‘खेलकुदले बनाउने समाज’ विषयक अन्तरक्रियामा सहभागीहरूले खेलकुदलाई समाज रूपान्तरणको प्रभावकारी माध्यमका रूपमा विकास गर्न राज्यले दीर्घकालीन नीति अवलम्बन गर्नुपर्ने बताए।
ओलम्पियन तथा लुम्बिनी प्रदेशका पूर्वमन्त्री सुरेन्द्र बहादुर हमालले खेलकुदले अनुशासन सिकाउने सबैभन्दा प्रभावकारी माध्यम भएको बताए। क्यान्सरसँग संघर्ष गरिरहेका आफूलाई खेलकुदले सिकाएको सकारात्मक सोच र आत्मविश्वासले ठूलो ऊर्जा दिएको उनको भनाइ थियो।
पूर्व राष्ट्रिय भारोत्तोलक समसुद्दीन सिद्दिकीले खेलकुदले स्वस्थ प्रतिस्पर्धाको संस्कार विकास गर्ने बताए। पूर्व राष्ट्रिय खेलाडी शान्ति सिंहले महिलाको सशक्तीकरणमा खेलकुदले महत्वपूर्ण भूमिका खेलेको उल्लेख गरिन्। पत्रकार तथा नेपालगन्ज म्याराथनका संयोजक टीएस ठकुरीले विकसित मुलुक र सहरको समृद्धिमा खेलकुदको महत्वपूर्ण योगदान रहेको बताए।
रंगशाला सञ्चालनमा जोड
सहभागीहरूले करोडौं रुपैयाँ खर्चेर निर्माण गरिएको नेपालगन्ज रंगशालालाई पूर्ण रूपमा सञ्चालनमा ल्याउन सरकारको ध्यानाकर्षण गराए। रंगशाला निर्माण भए पनि नियमित खेल गतिविधि सञ्चालन हुन नसकेको तथा यसको व्यवस्थापनसम्बन्धी अन्योल अन्त्य हुनुपर्ने उनीहरूको भनाइ थियो।
आठौं राष्ट्रिय खेलकुद आयोजना गर्दाका तत्कालीन मध्यपश्चिम क्षेत्रीय खेलकुद विकास समितिका अध्यक्ष भीम ओलीले रंगशालालाई चलायमान बनाउन सबै सरोकारवालाले संयुक्त पहल गर्नुपर्ने बताए।
२१ खेलाडी तथा खेलकर्मी सम्मानित
कार्यक्रममा बाँकेका २१ जना खेलाडी तथा खेलकर्मीलाई कदरपत्रसहित सम्मान गरिएको छ।
सम्मानित हुनेमा रतन कुमार टण्डन, अशोकजंग थापा, अजित कुमार शर्मा, सुरेन्द्र बहादुर हमाल, सच्चिदानन्द चौवे, समसुद्दीन सिद्दिकी, पार्वती थापा, अनिता श्रेष्ठ, लेखबहादुर क्षेत्री, चन्द्रबहादुर गुरुङ, गोविन्दप्रसाद श्रेष्ठ, राकेश श्रीवास्तव, गोबर्धन सिंह, शान्ति सिंह क्षेत्री, विक्रमजंग थापा, जयन्तकुमार शर्मा, राजुराज शाही, टीएस ठकुरी, नेरी थापा, डा. प्रतिक श्रेष्ठ र सन्तोषकाजी शाक्य रहेका छन्।
महेन्द्र पुस्तकालयका अनुसार उनीहरूलाई राष्ट्रिय तथा अन्तर्राष्ट्रिय खेलकुदमा पु¥याएको योगदान, खेल प्रशासन, प्रशिक्षण, पूर्वाधार विकास तथा खेल संस्कृतिको प्रवद्र्धनमा खेलेको भूमिकाको कदर गर्दै सम्मान गरिएको हो।
Discussion about this post