बाँके, साउन २६ गते ।
बाँकेको खजुरास्थित सुशील कोइराला प्रखर क्यान्सर अस्पतालमा किमोथेरापीमा प्रयोग हुने कार्बोप्लाटिन र सिसप्लाटिन औषधी चार महिनादेखि अभाव छ। औषधी आपूर्ति नहुँदा बिरामीको उपचार प्रभावित भएको छ भने आफन्तले बाहिरबाट, कतिपयले भारतबाट समेत औषधी ल्याउनुपर्ने अवस्था आएको छ।
अस्पतालका कार्यकारी निर्देशक डा. नीरज भट्टराईका अनुसार लामो समयदेखि अस्पतालको फार्मेसीमा यी दुवै औषधी उपलब्ध छैनन्। अस्पताललाई औषधी आपूर्ति गर्दै आएको काठमाडौँस्थित नागार्जुन फार्मेसीले नै औषधी उपलब्ध नभएको जानकारी गराएपछि आपूर्ति रोकिएको हो।
“क्यान्सर उपचारमा नियमित प्रयोग हुने अत्यावश्यक औषधी लामो समयदेखि उपलब्ध नहुँदा उपचारमा समस्या भएको छ,” उनले भने।
अस्पतालका सूचना अधिकारी डा. प्रवीणकुमार गुप्ताका अनुसार औषधी अभावका कारण अधिकांश बिरामीको किमोथेरापी प्रभावित भएको छ। यी औषधी क्यान्सर उपचारमा अत्यावश्यक रहेकाले आपूर्ति तत्काल सहज नभए उपचारमा थप जटिलता आउन सक्ने उनले बताए।
फार्मेसी विभागका प्रमुख दिनेश नेपालीले पनि चार महिनादेखि काठमाडौँबाट औषधी नआएको बताए। उनका अनुसार आपूर्तिकर्ता नागार्जुन फार्मेसीलाई पटक–पटक ताकेता गरिए पनि औषधी आपूर्ति हुन सकेको छैन।
नागार्जुन फार्मेसीका सञ्चालक प्रेम जेठाराले भने कच्चा पदार्थको मूल्य बढेपछि आयातकर्ताले औषधी आयात गर्न छाडेकाले आपूर्ति प्रभावित भएको बताए। उनका अनुसार इरान–अमेरिका युद्धका समयदेखि प्लाटिनम समूहका कच्चा पदार्थको मूल्य बढेको छ।
नेपालमा औषधीको मूल्य समायोजन नभएकाले आयातकर्ताले आयात गर्न छाडेको जेठाराको भनाइ छ। भारतलगायतका देशमा कार्बोप्लाटिन र सिसप्लाटिनको मूल्य ३० देखि ४० प्रतिशतसम्म बढाइएको उनले बताए।
बाजुराबाट किमोथेरापीका लागि खजुरा आएका बिरामीका आफन्त मनोज थापाले अस्पतालमै औषधी नपाएपछि बाहिरबाट खोज्नुपरेको बताए। “अस्पतालमा औषधी नपाएपछि भारतबाट समेत ल्याउनुपर्ने अवस्था आएको छ। यसले उपचार खर्चसँगै झन्झट पनि बढाएको छ,” उनले भने।
चिकित्सकका अनुसार पाठेघर, स्तन, फोक्सो, मिर्गौला, मूत्राशय तथा पुरुष प्रजनन अङ्गसम्बन्धी क्यान्सरका बिरामीको किमोथेरापीमा यी औषधी प्रयोग हुने गरेका छन्।
Discussion about this post