बाँके, भदौ १ गते ।
नेपालगन्ज नाकामा सशस्त्र प्रहरीले निकै नै कडाई गरेको छ । भारतबाट किनमेल गरेर आउनेको सामान एक एक गरि जाँचबुझ गर्ने र एक सय रुपैयाँभन्दा माथिको बस्तु भए जफत गर्दै आएको छ । तरकारी, खाने तेल र चियो पेय पदार्थ त छिसिक्क ल्याउन दिदैन । तर, सशस्त्र प्रहरीको उक्त कार्य देखावटी भएको प्रमाणित हुन थालेको छ ।
नेपालगन्ज नाकामा डिएसपीको कमाण्डमा सशस्त्र प्रहरीको भन्सार राजस्व गण छ । सहायक नाकालाई लक्षित गरि ठाउँ ठाउँमा प्रहरी निरीक्षकको कमाण्डमा विओपी छन् । हरेक पाँच सय मिटरको दूरीमा सशस्त्र प्रहरीका जवान र हवल्दारहरुले ड्यूटी दिन्छन् । सशस्त्र प्रहरीले अवैध सामान भित्रिन नदिन मोवाइल गस्ती समेत गर्दै आएको छ । यति हुँदाहुँदै जिल्ला प्रहरी कार्यालय बाँकेको टोलीले भारतबाट भन्सार छली गरि भित्र्याएको सामान नेपालगन्जबाट बरामद हुनुले सशस्त्र प्रहरीको काममा प्रश्न चिन्ह खडा गरेको छ ।
दिउँसोमा कडाई गरे पनि रातको समयमा तस्करीका सामान भित्र्याउन सशस्त्र प्रहरीले सहयोग गरिरहेको एक स्थानीयले बताए । ‘सशस्त्र प्रहरीको देखाउने दाँत र खाने दाँत फरक छ । दिउँसोको समयमा कडाई गरेको देखाएर रातको समयमा तस्करीका सामान भित्र्याउन सहयोग गर्दै आएको छ,’ एक स्थानीयले अनलाइन खोजखवरसँग भने ।
जिल्ला प्रहरी कार्यालय बाँकेको टोलीले विहीवार नेपालगन्ज उपमहानगरपालिका १९ बाट तीन लाख १० हजार र आइतवार नेपालगन्ज १० बाट २ लाख १६ हजार मुल्य बराबरको अवैध सामान बरामद गर्नुले पनि सशस्त्र प्रहरीले तस्करलाई सघाउँदै आएको छ भन्ने पुष्टि गरेको छ ।
बाँके प्रहरीले उक्त मुल्य बराबरको मोवाइलको डिस्प्ले र सुर्तिजन्य पदार्थ, पेय पदार्थ बरामद गर्नुले नाकामा खटिएका सशस्त्र प्रहरी, नेपाल प्रहरीका इलाका प्रहरी कार्यालय, प्रहरी चौँकीका इन्चार्जको मिलोमतो छ भन्ने प्रमाणित गरेको छ । ‘दिउँसोको समयमा सर्वसाधारणलाई दुख दिने सुरक्षाकर्मीले रातको समयमा तस्करीको सामान भित्र्याउन सहयोग गर्दै आएका छन्,’ एक प्रत्यक्षदर्शीले भने ।
नाकामा खटिने सशस्त्र प्रहरीलाई प्रलोभनमा नपर्न र कुनै किसिमको लापरवाही नगर्न सशस्त्र प्रहरीका आइजिपीले कडा निर्देशन दिएका छन् । गृह मन्त्री सुधन गुरुङले पनि नाकामा कडाई गर्न र अवैध सामान भित्रिन नदिन निर्देशन दिएका छन् । गृहमन्त्री गुरुङले नाकामा गोप्य रुपले छड्केसमेत गर्दै आएका छन् ।
तर, नाकामा खटिने सुरक्षाकर्मीले दामको लोभमा परेर तस्करलाई सघाउँदै आएका छन् । ‘सशस्त्र प्रहरीको कडाईले सुइयोसमेत भित्रिन सक्ने अवस्था छैन, तर लाखौँ रुपैयाँको सामान भित्रिनुले सशस्त्र प्रहरीको ‘दिलमा कुछ काला है’ भन्ने प्रमाणित गर्दछ,’ एक स्थानीयले भने ।
Discussion about this post