बाँके, भदौ २ गते ।
बाँकेमा प्रहरीले १४ किलो ५४ ग्राम अफिमसहित दुई जनालाई पक्राउ गरेको छ। प्रहरीले उनीहरूको साथबाट १४८ ग्राम चरेसजस्तो देखिने पदार्थ, डिजिटल तराजु र ५ हजार रुपैयाँ नगद पनि बरामद गरेको छ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतित सिंह राठौरका अनुसार सोमबार कोहलपुर नगरपालिका–११ चौतारानजिक अफिमको कारोबार भइरहेको सूचना पाएपछि इलाका प्रहरी कार्यालय कोहलपुर र लागूऔषध नियन्त्रण ब्युरो शाखा कार्यालय नेपालगन्जबाट प्रहरी टोली खटिएको थियो।
टोलीले शंकास्पद रूपमा हिँडिरहेका रुकुम पूर्वको सिस्ने गाउँपालिका–१ का ४३ वर्षीय कर्णबहादुर बुढालाई नियन्त्रणमा लिएर खानतलासी गरेको थियो। त्यस क्रममा उनको साथबाट अफिमजस्तो देखिने पदार्थ ९९० ग्राम बरामद भएको राठौरले बताए।
‘बुढालाई नियन्त्रणमा लिएर अनुसन्धान गर्दा थप व्यक्तिको संलग्नता खुलेको थियो,’ उनले भने, ‘त्यसपछि कोहलपुर–६ मा डेरा गरी बस्ने रुकुम पश्चिमको मुसिकोट नगरपालिका–८ का ६० वर्षीय टोपजङ भन्ने टाइप सिंह गिरीलाई नियन्त्रणमा लिन प्रहरी टोली पुगेको थियो।’
प्रहरी टोली पुगेपछि गिरी भाग्न खोजेको राठौरले बताए। उनका अनुसार गिरीलाई नियन्त्रणमा लिन एक राउन्ड हवाई फायर गरिएको थियो।
गिरीको कोठामा खानतलासी गर्दा फ्रिजभित्र लुकाएर राखेको अवस्थामा अफिमजस्तो देखिने पदार्थ १३ किलो ६४ ग्राम बरामद भएको प्रहरीले जनाएको छ। बुढाको साथबाट बरामद ९९० ग्रामसमेत गरी कुल १४ किलो ५४ ग्राम अफिम बरामद भएको हो।
गिरीको कोठाबाट १४८ ग्राम चरेसजस्तो देखिने पदार्थ, डिजिटल तराजु एक थान र नेपाली ५ हजार रुपैयाँ पनि बरामद भएको राठौरले बताए।
पक्राउ परेका बुढा र गिरीमाथि लागूऔषधसम्बन्धी कसुरमा आवश्यक अनुसन्धान भइरहेको जिल्ला प्रहरी कार्यालय बाँकेले जनाएको छ।
Discussion about this post