बाँके, असोज २३ गते।
बाँकेमा पाक्न लागेको धानबालीमा मरुवा र खैरो थोप्ले रोगको संक्रमण देखिएपछि किसान चिन्तित भएका छन्। धानका बोट सुक्न र पात पहेँलिन थालेपछि उत्पादन घट्ने चिन्ता बढेको हो।
कृषि ज्ञान केन्द्र बाँकेका सूचना अधिकारी सुजिता शर्माका अनुसार जिल्लाका विभिन्न स्थानमा धानमा रोग लागेर बोट सुक्न थालेको गुनासो आएको छ। खेतको निरीक्षण गर्दा केही स्थानमा मरुवा र केहीमा खैरो थोप्ले रोगको संक्रमण देखिएको उनले बताइन्।
उनका अनुसार केही दिनअघि परेको भारी वर्षा र हावाहुरीका कारण पाक्न लागेको धान ढलेको थियो। त्यसपछि चर्को घाम लाग्दा केही खेतमा रोगको संक्रमण देखिएको उनले बताइन्। नेपालगन्ज, डुडुवा र जानकीलगायतका स्थानीय तहमा धानबालीमा यस्तो समस्या देखिएको छ।
कृषि ज्ञान केन्द्रले रोगको पहिचान र व्यवस्थापनका लागि किसानलाई प्राविधिक सहयोग गरिरहेको जनाएको छ।
डुडुवा गाउँपालिका–५ का किसान अम्मर बुढाथोकीले धानका पातमा खैरो तथा हरियो रङका पानीले भिजेजस्ता थोप्ला देखिने र संक्रमण बढ्दै जाँदा बोट सुक्ने समस्या देखिएको बताए। यस वर्ष धान उत्पादन राम्रो हुने अपेक्षा गरे पनि पाक्ने बेलामा रोग देखिएपछि चिन्ता बढेको उनले बताए।
धानमा रोग देखिएको जानकारी वडा कार्यालय र गाउँपालिकाको कृषि शाखामा गराउँदासमेत रोकथामका लागि आवश्यक पहल नभएको बुढाथोकीले गुनासो गरे।
नेपालगन्ज उपमहानगरपालिका–१९, सुइयागाउँका किसान ललवा माहुतको धानबालीमा पनि यस्तै समस्या देखिएको छ। फल लाग्ने बेला परेको भारी वर्षा र हावाहुरीले धान ढालेको र अहिले बोट पहेँलिँदै सुक्न थालेको उनले बताए। धान पाक्ने समयमा यस्तो समस्या देखिँदा उत्पादन घट्ने चिन्ता बढेको उनको भनाइ छ।
कृषि ज्ञान केन्द्रका सूचना अधिकारी शर्माले जिल्लाका केही धानखेतमा रोगको संक्रमण देखिएको जानकारी आए पनि क्षतिको यकिन विवरण प्राप्त नभएको बताइन्। अहिले स्थानीय तहसँग समन्वय गरेर रोगको अवस्था र क्षतिको विवरण सङ्कलन भइरहेको उनले जानकारी दिइन्।
कृषि ज्ञान केन्द्रका अनुसार बाँकेमा कुल ५४ हजार ५२६ हेक्टर खेतीयोग्य जमिनमध्ये ३३ हजार ५७० हेक्टरमा धानखेती हुँदै आएको छ। यस वर्ष जिल्लामा ३३ हजार ५०३ हेक्टर क्षेत्रफलमा धान रोपाइँ भएको केन्द्रले जनाएको छ।
Discussion about this post