बाँके फागुन २२ गते ।
रंगहरूको पर्व होली आज आजदेखि सुरु भएको छ । आज पहाड र भोलि तराईमा होली पर्व मनाइने भएपनि नेपालगन्जमा भने दुई दिन नै होलि पर्व मनाउने चलन रहेको छ ।
होली पर्वलाई लक्षित गरेर नेपालगन्जका चोकहरु पिचकारी र रंगले सजिएका छन् । नेपालगन्जको धम्बोजी, त्रिभुवन चोक, त्रिवेणीमोड, फुलटेक्रा लगायतका स्थानमा पिचकारी, लोला तथा रंगहरुको पसलनै खुलेका छन् । यस्तै विभिन्न ठाउँमा विशेष कार्यक्रमको आयोजना गरेर होली मनाइँदैछ ।
नेपाल पत्रकार महासंघ, प्रेस युनियन, कोहलपुरका पत्रकारहरुले छुटछुट्टै कार्यक्रमको आयोजना गरी होली पर्व मनाएका छन् । फागु पर्वमा एक आपसमा विभिन्न रङ्ग तथा अबिर लगाएर मनाउने चलन छ । केही वर्षदेखि रङको पर्व होली सभ्य बन्दै गएको छ । केही वर्षअघिसम्म एक हप्ता अघिदेखि नै लोला हान्ने प्रवृत्ति थियो । तर, चार पाँच वर्षयता फागु पर्वलाई अनुशासित भएर मनाउने गरिएको पाइन्छ ।
सडकमा काम विशेषले हिँड्नेलाई इच्छा विपरीत रङ र लोला हान्ने क्रम बन्द भएको छ । वसन्त ऋतुको आगमनसँगै आपसी मेलमिलाप र सद्भावनाको सन्देश लिइ आउने फागु पर्व आज पहाडी जिल्लामा र भोलि तराईका जिल्लामा मनाइन्छ । होहल्ला नगरि, जाँडरक्सी तथा लागुपदार्थ नखाइ एकआपसमा रमाएर होली मनाउन प्रहरीले अनुरोध गरेको छ। अभद्र तरिकाले होली खेलिएको पाइए कारबाही हुनेछ ।
यस्तै, कसैले इच्छा विपरीत रङ लगाए, लोला हाने वा फोहर पानी र विभिन्न केमिकल मिसिएको पदार्थ लगाइदिए तुरुन्त प्रहरीको १०० नम्बरमा फोन गरेर जानकारी दिन आग्रह गरिएको छ । इच्छा विपरीत रङ वा लोला हाने पक्राउ गरेर मुद्दा चलाइने बाँकेका एसपी सन्तोष सिंह राठोरले बताउनुभयो ।
मोटरसाइकल चलाउँदा हेलमेट अनिवार्य लगाउन, तीन जना नचढ्न र जाँडरक्सी वा लागुपदार्थ खाएर गाडी नचलाउन प्रहरीले आग्रह गरेको हो ।
Discussion about this post