बाँके चैत २६ गते ।
नेपालगन्ज उपमहानगरपालिका २१, विर्ताका अरबी खाँको हत्या भएको नौँ दिन वित्दासमेत अपराधि फेला नपरेपछि परिवारका सदस्यले प्रहरीको अनुसन्धान माथि आशंका गरेका छन् । घटना भएको नौँ दिन वित्दासमेत अपराधि फेला नपरेपछि परिवारका सदस्य थप पीडित भएका छन् ।
चैत १८ गतेको राती विर्ताका २२ वर्षिय अरबी खाँको सुनियोजित तरिकाले हत्या भएको थियो । उनको शव घरदेखि एक किलोमिटर टाढा इट्टा भट्टा नजिक फेला परेको थियो । घाँटी रेटेर हत्या भएको अवस्थामा चैत १९ गते विहान करिव १० बजे फेला परेको बाँके प्रहरीले जनाएको छ ।
प्रहरीले अनुसन्धानको नाममा परिवारका सदस्यलाई झुक्याइरहेको मृतक अरबीका काका अब्दुल रहमान खाँले बताए । उनले प्रहरीले अनुसन्धानमा लापरवाही गरेको गुनासो गर्दै प्रहरीले चाहेमा तत्काल पक्राउ गर्न सक्ने बताए । ‘अनुसन्धान भइरहेको छ नआत्तिनुस भनेर प्रहरीले आश्वासनमात्र दिन्छ ।
नौँ दिन वित्दासमेत पक्राउ नगर्नुले प्रहरीको अनुसन्धानमाथि आशंका गर्ने ठाउँ उब्जिएको छ,’ उनले भने, ‘प्रहरीले सक्दैन भने हामी पत्ता लगाउँछौँ र कारवाही पनि हामीले नै गर्छौँ ।’
बास्तविक अपराधि पत्ता लगाउन र निर्दोषलाई नफसाउन परिवारजनले प्रहरीसँग आग्रह गरेका छन् । बास्तविक अपराधि फेला नपर्दासम्म शव नबुझ्ने मृतकका हजुर बुवा रञ्जित खाँले बताए । उनले भने, ‘नातीको हत्यामा संलग्न ब्यक्ति पक्राउ नपर्दासम्म शव बुझ्दैनौँ । चाहे वर्ष दिन किन नवितोस ।’
बाँके प्रहरीबाट अनुसन्धान गर्न नसकेपछि सिआइवीको टोली मगाउने तयारी भएको जिल्ला प्रहरी कार्यालय बाँकेले जनाएको छ । थप अनुसन्धानका लागि सिआइवीको टोली मगाउन परिपत्र गर्न लागेको बाँके प्रहरी प्रवक्ता डिएसपी नारायण डाँगीले जानकारी दिए । ‘सिआइवीसँग समन्वय गरेर अनुसन्धान भइरहेको छ । थप अनुसन्धान गर्न आवश्यक परेको खण्डमा सिआइवीको टोलीलाई बोलाउने तयारी छ,’ डिएसपी डाँगीले भने ।
२२ वर्षिय छोरा अरबी खाँको घाँटी रेटर हत्या भएपछि उनको आमाको आँखाबाट आँशु रोकिएको छैन । उनी घरिघरि अर्ध चेत भएर ढल्छिन् । बेहोसीमै बरबराउँछिन् । छोराको नाम लिएर बोलाउँछिन् । छोरालाई फर्काई दिनु भन्दै अल्लाहसँग पुकार गर्छिन् । विभत्स तरिकाले हत्या भए पछि खाँ परिवार मात्र नभई पुरै गाउँ अहिले शोकमा छ ।
हत्यामा संलग्न ब्यक्तिको पहिचान हुन नसकेपछि मृतक अरबी खाँको परिवार थप पीडामा छ । खाँ परिवार राम्रोसँग निदाउन र खान सकेको छैन । रमजानको रोजा पनि बस्न छाडेका छन् । ‘१९ औं रोजासम्म ब्रत बस्यौँ । शव फेला परेको दिनदेखि खाना खाने त परको कुरा भयो, घरमा चुल्होसमेत बलेको छैन,’ बाजे रञ्जित खाँले भने, ‘घरमा रुवाबासी छ । खाना पाक्ने र खाने कसरी ।’
Discussion about this post