बाँके असोज ८ गते ।
बाँके प्रहरीले चाडपर्व लक्षित सुरक्षा योजना बनाएको छ । भारतबाट फर्किने नेपालीलाई सहज तथा सुरक्षित रुपमा गन्तब्यसम्म जाने वातावरण बनाउन नेपालगन्जको जमुनाहा नाका, नेपालगन्ज र कोहलपुर बसपार्कमा विहीवारदेखि यात्रु सहायता कक्ष संचालन गर्न लागेको बाँकेका प्रहरी प्रवक्ता डिएसपी दीपक पातलीले जानकारी दिए । ‘भारतबाट आएका नेपालीलाई सहज, सुरक्षित रुपमा गन्तब्यसम्म पुग्ने वातावरण मिलाउन यात्रु सहायता कक्ष संचालन गर्दै छौँ,’ उनले भने ।
उनले दसै, तिहार र छठ पर्व पर्वलाई लक्षित गरि नेपाल प्रहरीका ११ सय सुरक्षाकर्मी परिचालन गरिएको बताए । उनले दसैँका बेला हुन सक्ने चोरीका घटना हुन नदिन नेपालगन्ज, कोहलपुर लगायत ठाउँमा मोवाइल र पैदल गस्तीलाई तीव्र पारिएको बताए । ‘सर्वसाधारणलाई सुरक्षित रुपमा चाडपर्व मनाउने वातावरण बनाउन र सुरक्षित छौँ भन्ने बनाउन मोवाइल र पैदल गस्ती बढाइएको छ,’ उनले भने ।
नेपालगन्जमा स्थापना गरिएका दुर्गा मुर्तीको सुरक्षाका लागि समेत प्रहरी परिचालन गरिएको बताउँदै डिएसपी पातलीले विगतमा भएका घटना र सुरक्षा योजनाबाट पाठ सिकेर सुरक्षाकर्मी परिचालन गरिएको अनलाईन खोजखवरलाई जानकारी दिए । ‘आवश्यकता अनुसार ड्रोन क्यामेराबाट पनि निगरानी भइरहेको छ । सर्वसाधारणलाई सुरक्षति बनाउन र सुरक्षित रुपमा चाडपर्व मनाउन सुरक्षा ब्यवस्था मिलाइएको छ,’ उनले भने, ‘बाहिर चलेको हल्लाको पछि नलाग्न र निर्धक्कसँग दसैँ मनाउन जिल्ला प्रहरी कार्यालय आग्रह गर्दछ ।’ उनले शान्त र सभ्य रुपमा चाडपर्व मनाउन आग्रह समेत गरेका छन् ।
आफ्नो चाडपर्व मनाउँदा अर्कालाई असर पर्ने कार्य नगर्न आग्रह गर्दै उनले होहल्ला गर्नेहरु कारवाहीको भागिदार हुनुपर्ने स्पष्ट पारे । ‘चाडपर्वको नाममा हुने विकृतिका विरुद्ध बाँके प्रहरी खरो रुपमा उत्रिने स्पष्ट पार्न चाहन्छ,’ उनले भने, ‘आफूले चाडपर्व मनाउँदा अर्कालाई असर पर्ने कार्य गरेको पाइएमा कारवाहीको भागिदार हुनुपर्ने छ ।’
यात्रु सहायता कक्षमा ट्राफिक प्रहरी समेत परिचालन हुने भएका छन् । जनपद प्रहरी र ट्राफिक प्रहरीले संयुक्त रुपमा चेकजाँच गर्ने बताउँदै उनले तीव्र गतिमा सवारी साधन चलाएको पाइएमा कारवाही गरिने बताए । ‘ट्राफिक नियम विपरित कार्य गरेको पाइएमा चालकलाई ठाउँका ठाउँ कारवाही गर्ने नीति बनाइएको छ,’ उनले भने ।
चाडपर्वमा मादक पदार्थ सेवन गरि सवारी साधन चलाउने र छिटो पुग्ने नाममा तीव्र गतिमा सवारी साधन चलाउने विगतको अध्ययनले देखाएको बताउँदै उनले विभिन्न सडकमा जनपद प्रहरीसँगै ट्राफिक प्रहरी परिचालन गरिएको जानकारी दिए ।
चाडपर्वलाई लक्षित गरि चालकको लागु औषध सेवन (लापसे), मादक पदार्थ सेवन (मापसे) र क्षमताभन्दा बढि यात्रु भए–नभएको जाँचलाई तीव्र पारिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक पुष्करराज पन्तले जानकारी दिए ।
उनले बाँकेमा ७५ जना ट्राफिक प्रहरी परिचालन भएको बताउँदै लापसे, मापसे र क्षमता भन्दा बढि यात्रु बसेको पाइएमा कारवाही गरिने बताए । ‘एक जना चालकले गाडी चलाउँदा मार पर्ने भएकोले लामो दूरीमा चल्ने सवारी साधनमा दुई जना चालक भए–नभएको जाँच भइरहेको छ,’ उनले भने ।
उनले यात्रु सहायता कक्ष मार्फत यात्रुको गुनासो सुन्ने ब्यवस्था मिलाइएको बताए । ‘सवारी साधनको गति हेर्न र क्षमताभन्दा बढि यात्रु बसालेको छ, छैन जाँचबुझ गर्न सडकमा छड्के जाँचलाई बढाइएको छ,’ पन्तले भने ।
Discussion about this post