बाँके पुस १८ गते ।
नेपालगन्ज उद्योग वाणिज्य सङ्घले तस्करी नियन्त्रणको माग गर्दै लुम्बिनी प्रदेश सरकारलाई आन्तरिक मामिला तथा कानुन मन्त्रीमार्फत सात बुँदे ज्ञापनपत्र पठाएको छ ।
सङ्घ स्थापनाको ५८औँ वार्षिकोत्सवको अवसरमा बिहीबार नेपालगन्जमा आयोजित कार्यक्रममा सङ्घका कार्यवाहक अध्यक्ष चिरञ्जीवी ओलीले लुम्बिनी प्रदेशका आन्तरिक मामिला तथा कानुन मन्त्री आदेशकुमार अग्रवाललाई उक्त ज्ञापनपत्र बुझाएका हुन् ।
ज्ञापनपत्रमा सीमावर्ती भारतीय बजार रूपैडिहामा भारतीय सीमा सुरक्षा बल (एसएसबी) ले गरेको जस्तै जमुनाह नाकामा पनि परिचयपत्र अनिवार्य रूपमा जाँच गर्ने व्यवस्था लागू गर्नुपर्ने माग गरिएको छ । साथै, सम्भावित तस्करी हुने नाकाहरूमा ब्यारियरसहित सशस्त्र प्रहरीको अस्थायी पोस्ट राख्नुपर्ने, पाइडल रिक्साको निर्बाध सीमा वारपार आवागमन रोक्नुपर्ने उल्लेख गरिएको छ ।
सशस्त्र द्वन्द्वको समयमा बन्द गरिएका साइगाउँ, भनघोटना, खडैचा, उढरापुर, भगवानपुर, नरैनापुर र सुइँयाबघौडाका छोटी भन्सारहरू पुनः सञ्चालन गर्नुपर्ने माग पनि ज्ञापनपत्रमा समावेश गरिएको छ ।
यसैगरी, जमुनाह नाकामा स्क्यानर मेसिन राखी अनिवार्य चेकजाँचको व्यवस्था गर्नुपर्ने तथा नेपालगन्ज भन्सार कार्यालयले लक्ष्यअनुसार राजस्व सङ्कलन गर्न नसकिरहेको विषयमा अध्ययन गरी अवैध आयात–निर्यातमा संलग्न प्रहरी, प्रशासन र भन्सार कर्मचारीलाई कारबाही गर्नुपर्ने माग सङ्घले गरेको छ ।
ज्ञापनपत्र बुझ्दै मन्त्री अग्रवालले तस्करी तथा क्यारिङ नियन्त्रण गर्न नसक्ने प्रहरी–प्रशासनलाई कारबाही गरिने स्पष्ट पारे । उनले यस विषयमा प्रहरी र प्रशासनका उच्च अधिकारीहरूलाई पटक–पटक निर्देशन दिँदै आएको र आगामी दिनमा तस्करी नियन्त्रणका लागि अझ कडा कदम चालिने बताए ।
मन्त्री अग्रवालले सीमा नाकामा भइरहेको तस्करी र अवैध आयातप्रति आफू गम्भीर रहेको उल्लेख गर्दै यस विषयमा सङ्घीय सरकारको गृह मन्त्रालय र प्रहरी महानिरीक्षकसँग पनि छलफल गर्ने बताए ।
कार्यक्रममा लुम्बिनी प्रदेशसभा सदस्य मीनाकुमारी श्रेष्ठ तथा सङ्घका पूर्वअध्यक्षहरू कृष्णप्रसाद श्रेष्ठ र नन्दलाल वैश्यले नाकामा कडाइ नहुँदा नेपालगन्जको व्यापार व्यवसाय धराशायी बन्दै गएको भन्दै तस्करी र अवैध आयात रोक्नु अत्यावश्यक भएको धारणा राखे ।
सोही अवसरमा नेपालगन्ज उद्योग वाणिज्य सङ्घका पूर्वअध्यक्षहरू कन्हैयालाल टन्डन, शतिशचन्द्र अग्रवाल, कृष्णप्रसाद श्रेष्ठ र नन्दलाल वैश्यलाई सम्मान गरिएको थियो । सङ्घलाई अगाडि बढाउन उनीहरूले पु¥याएको योगदानको कदरस्वरूप सम्मान गरिएको सङ्घका कार्यवाहक अध्यक्ष चिरञ्जीवी ओलीले बताए ।
Discussion about this post