बाँके पुस २१ गते ।
बाँकेका विभिन्न सामाजिक संजाल प्रयोगकर्तालाई अनर्गल प्रचार नगर्न बाँके प्रहरीले आग्रह गरेको छ । विभिन्न घटनाको बारेमा गहिरिएर अनुसन्धान गरिरहेको बताउँदै बाँके प्रहरीले अनुसन्धानलाई प्रभावमा पार्नेगरि सामाजिक संजालमा पोष्ट नगर्न विज्ञप्तिमार्फत आग्रह गरेको हो ।
यहि पुस १७ गते बिहान करिब २ बजे बाँके जिल्लाको डुडुवा गाउँपालिका वडा नं. ४ का सद्दाम खाँलाई एक समूहले मरणासन्न हुने गरी कुटपिट गरेको घटनाको गहिरिएर अनुसन्धान भइरहेको जनाउँदै प्रहरीले घटनालाई तोडमरोड नगर्न सचेत गराएको छ । उक्त घटनालाई धार्मिक रंग दिने र सामाजिक द्वन्द्व भड्काउने प्रयास नगर्न समेत प्रहरीले सचेत गराएको छ । ‘घटनाको जानकारी पाउने वित्तिकै प्रहरी टोली घटनास्थलमा पुगेर घाइतेको उद्धार गरी उपचारका लागि नेपालगञ्ज न्यूरो हस्पिटलमा ल्यायौँ ।
त्यहाँ प्राथमिक उपचारपछि थप उपचारका लागि भारतको लखनउ पठाइएको छ । पारिवारिक स्रोतका अनुसार घाइतेको स्वास्थ्य अवस्था हालसम्म गम्भीर रहेको जानकारी पाएका छौँ,’ जिल्ला प्रहरी कार्यालय बाँकेका प्रवकता डिएसपी दीपक पातलीले भने, ‘सोही घटनासँग जोडिएर एक जना नाबालिका बलात्कार भएको विषयमा पनि प्रहरीले स्वास्थ्य परीक्षणसँगै अनुसन्धान प्रक्रिया अगाडि बढाएको जनाएको छ । यी दुवै घटनालाई जोडेर अनर्गल प्रचार गर्ने र सामाजिक द्वन्द्व बढाउने कार्य प्रहरीलाई स्वीकार्य हुँदैन ।’
दुवै घटना फौजदारी अपराध भएको बताउँदै प्रहरीले अनुसन्धानकै क्रममा रहेकोले अनावश्य कुरा बाहिर नल्याउन सचेत समेत गराएको छ ।
यस्ता भ्रामक प्रचारले सामाजिक सद्भाव बिग्रन सक्ने भएकाले संयमित रहन सबैमा आग्रह गरिएको छ। जिल्ला प्रहरी कार्यालय बाँकेले निष्पक्ष र तथ्यमा आधारित अनुसन्धान गरी दोषीलाई कानुनी दायरामा ल्याइने प्रतिबद्धता व्यक्त गर्दै अनुसन्धानमा सहयोग गर्न सर्वसाधारणसँग अनुरोध गरेको छ। साथै, पीडितलाई थप पीडित बनाउने, चरित्र हत्या गर्ने, झुट्टा प्रचार गर्ने जो–कोहीलाई कानुनअनुसार कारबाही गरिने चेतावनी पनि प्रहरीले दिएको छ।
Discussion about this post