बाँके पुस २२ गते ।
गत दुई सातायता बाँकेमा शीतलहर र हुस्सुका कारण चिसो अत्यधिक बढेको छ । चिसो बढेसँगै यस क्षेत्रको जनजीवन प्रभावित बनेको छ ।
अत्यधिक चिसोका कारण बिहान र बेलुकी सडकमा सवारी साधन तथा मानिसको आवागमन निकै कम देखिएको छ । सरकारी कार्यालयमा सेवाग्राहीको संख्या घटेको छ भने विद्यालयमा बालबालिकाको उपस्थितिमा पनि कमी आएको छ ।
चिसो बढेपछि नेपालगन्जका प्रमुख बजार क्षेत्र त्रिभुवन चोक, सदरलाइन, घरबारीटोल, बीपी चोक, बीरेन्द्र चोक र पुष्पलाल चोकमा चहलपहल घटेको छ । शीतलहरका कारण बजारमा मानिसको आवतजावत कम भएको नेपालगन्जका नागरिक अगुवा कृष्णप्रसाद श्रेष्ठले बताए ।
शीतलहर र चिसोबाट सबैभन्दा बढी रिक्सा चालक, ठेला चालक र मजदुर प्रभावित भएका छन् । यसका साथै बालबालिका र वृद्धवृद्धामा पनि चिसोको असर बढी देखिएको छ ।
चिसो बढ्दै गएपछि जिल्ला विपद् व्यवस्थापन समिति र नेपाली सेनाले केही स्थानमा सर्वसाधारणका लागि आगो ताप्ने व्यवस्था मिलाएका छन् । स्थानीय तहलाई पनि आ–आफ्नो पालिकामा यस्तो व्यवस्था गर्न आग्रह गरिएको जिल्ला विपद् व्यवस्थापन समिति बाँकेका संयोजक तथा प्रमुख जिल्ला अधिकारी दिलकुमार तामाङले जानकारी दिए ।
शीतलहर, कुहिरो र भिजिबिलिटी कम भएका कारण तीन दिनदेखि बिहान र बेलुकी नेपालगन्जबाट हुने अधिकांश हवाई उडान प्रभावित भएका छन् । हुम्ला, बाजुरा, मुगुको रारा, डोल्पा र जुम्लाजस्ता पहाडी जिल्लाका लागि बिहान हुने अधिकांश उडान रद्द हुने गरेका छन् भने केही उडान ढिलाइ भएका छन् ।
नागरिक उड्डयन कार्यालय नेपालगन्जका अनुसार पहाडी जिल्लासँगै संघीय राजधानी काठमाडौँका लागि हुने बिहान र बेलुकीका उडानहरू पनि प्रभावित भइरहेका छन् ।
गत केही दिनयता नेपालगन्जको तापक्रम निरन्तर घट्दै गएको छ । पछिल्ला दिनमा यहाँको तापक्रम ९ देखि १३ डिग्री सेल्सियससम्म झरेको नेपालगन्ज विमानस्थलको टावरले जनाएको छ ।
Discussion about this post