बाँके फागुन १६ गते ।
प्रतिनिधिसभा निर्वाचनको मिति नजिकिँदै जाँदा रोजगारीका सिलसिलामा भारतका विभिन्न सहरमा पुगेका नेपाली नागरिकहरू मताधिकार प्रयोग गर्न स्वदेश फर्कने क्रम बढ्दै गएको छ । बाँकेको सीमावर्ती जमुनाह नाकामा दैनिक रूपमा घर फर्किने नेपालीहरूको आवागमनमा उल्लेखनीय वृद्धि देखिएको छ ।
जमुनाह प्रहरी प्रमुख प्रहरी निरीक्षक किरण मल्लका अनुसार निर्वाचनलाई लक्षित गर्दै सीमा क्षेत्रमा सुरक्षा व्यवस्था कडा पारिएको छ । उनले सीमा नाकामा चेकजाँचलाई तीव्र बनाइएको जानकारी दिँदै स्वदेश फर्किने नागरिकहरूको सहज आवागमनका लागि आवश्यक समन्वय गरिएको बताए ।
भारतका मुम्बई, गोवा, पुणे, पञ्जाब, हरियाणा लगायतका स्थानमा मजदुरी गर्दै आएका नेपालीहरू कामबाट समय मिलाएर मतदानमा सहभागी हुन गाउँ फर्किरहेका छन् । उनीहरूमा आफ्नो मतमार्फत देशको भविष्य निर्धारण गर्ने उत्साह देखिन्छ ।
मतदानका लागि स्वदेश फर्किएका दैलेखका रामबहादुर वलीले देशलाई सक्षम, इमानदार तथा जनताको पक्षमा काम गर्ने नेतृत्व आवश्यक रहेको बताए । “देशमै रोजगारी सिर्जना गर्ने र युवालाई विदेशिनु नपर्ने वातावरण बनाउने नेतृत्व चाहिन्छ,” उनले भने । आफ्नो मतको सही सदुपयोग हुनेमा आफू आशावादी रहेको वलीको भनाइ छ ।
निर्वाचन नजिकिँदै जाँदा स्वदेश फर्किने मतदाताको संख्या बढ्नुले लोकतन्त्रप्रतिको विश्वास, नागरिक चेतना र जिम्मेवारीबोध सुदृढ बन्दै गएको संकेत गरेको छ । सीमा क्षेत्रमा अपनाइएको सुरक्षा सतर्कता तथा नागरिकको सक्रिय सहभागिताले निर्वाचनलाई शान्तिपूर्ण र सफल बनाउन सहयोग पुग्ने अपेक्षा गरिएको छ ।
Discussion about this post