बाँके फागुन १६ गते ।
कोहलपुर नगरपालिकाले नगर क्षेत्रभित्र रहेका प्रयोगविहीन तथा अव्यवस्थित केवल तारहरू १५ दिनभित्र हटाउन सार्वजनिक सूचनामार्फत अल्टिमेटम दिएको छ।
नगर क्षेत्रमा जडान भई अव्यवस्थित रूपमा झुन्डिएका केवल तारका कारण सहरी सौन्दर्यमा नकारात्मक असर परिरहेको तथा आगलागी र सवारी दुर्घटनाको जोखिम बढिरहेको भन्दै तार हटाउन निर्देशन दिइएको हो।
नगरपालिकाका प्रमुख प्रशासकीय अधिकृत मानबहादुर गिरीले १५ दिनभित्र अव्यवस्थित तार हटाउन सम्बन्धित निकायलाई सूचना जारी गरिएको जानकारी दिए। उनका अनुसार केवल तारसँग सम्बन्धित सेवा प्रदायक संस्थाहरूलाई व्यवस्थापनका लागि स्पष्ट निर्देशन दिइएको छ।
गिरीले अव्यवस्थित रूपमा झुन्डिएका तारका कारण नगरको सौन्दर्यमा ह्रास आएको र जताततै लतारिएका तारले सम्भावित दुर्घटना निम्त्याउन सक्ने भएकाले तत्काल हटाउने निर्णय गरिएको बताए। सरोकारवाला पक्षहरूको बैठकले समेत सो समस्या समाधानका लागि शीघ्र कार्यान्वयनमा जाने निष्कर्ष निकालेको थियो।
बैठकको निर्णयअनुसार नगर क्षेत्रभित्र विभिन्न केवल टेलिभिजन तथा दूरसञ्चार सेवा प्रदायक संस्थाहरूले जडान गरेका र हाल प्रयोगविहीन अवस्थामा रहेका सबै अव्यवस्थित तार सम्बन्धित निकायले चैत १ गतेभित्र आफैँ हटाउनुपर्नेछ। तोकिएको समयभित्र तार नहटाए चैत २ गतेदेखि नगरपालिकाले त्यस्ता तार हटाउने कार्य सुरु गर्ने जनाइएको छ।
नगरपालिकाले सूचना प्रकाशित भएको मितिले १५ दिनभित्र प्रयोगविहीन तार नहटाएमा नगरपालिका स्वयंले हटाउने र त्यसबापत लाग्ने सम्पूर्ण खर्च सम्बन्धित पक्षबाट असुलउपर गरिने स्पष्ट पारेको छ।
Discussion about this post