बाँके, असार २१ गते।
बाँकेको खजुरा गाउँपालिकाले असहाय, अनाथ तथा जोखिममा परेका बालबालिकाको संरक्षण, पालनपोषण र समग्र विकासका लागि ‘खजुरा बाल संरक्षण गृह’ सञ्चालनमा ल्याएको छ।
गाउँपालिकाभित्र अभिभावकविहीन भई सडकमा बस्न बाध्य तथा विभिन्न कारणले जोखिमपूर्ण अवस्थामा रहेका बालबालिकालाई सुरक्षित आश्रय उपलब्ध गराउने उद्देश्यले आफ्नै लगानीमा संरक्षण गृह स्थापना गरिएको गाउँपालिका अध्यक्ष डबर बिकले जानकारी दिए।
उनका अनुसार प्रत्येक बालबालिकालाई सुरक्षित वातावरण, शिक्षा, माया र उज्ज्वल भविष्यको अधिकार सुनिश्चित गर्नु स्थानीय सरकारको दायित्व हो। संरक्षण गृहले बालबालिकालाई आश्रय मात्र नभई गुणस्तरीय शिक्षा, स्वास्थ्य सेवा र आवश्यक संरक्षण प्रदान गर्दै उनीहरूलाई आत्मनिर्भर तथा जिम्मेवार नागरिकका रूपमा विकास गर्न सहयोग गर्नेछ।
अध्यक्ष बिकले बालबालिकाको चौतर्फी विकास, संरक्षण र बालअधिकार सुनिश्चित गर्न संरक्षण गृह प्रभावकारी माध्यम बन्ने विश्वास व्यक्त गरे। उनका अनुसार गृहमा बालबालिकाको शारीरिक, मानसिक, शैक्षिक र सामाजिक विकासलाई केन्द्रमा राखेर आवश्यक कार्यक्रम सञ्चालन गरिनेछ।
गाउँपालिकाकी उपाध्यक्ष मञ्जु मल्लले संरक्षण गृहमा आश्रित बालबालिकाका लागि नियमित विद्यालय शिक्षा, स्वास्थ्य परीक्षण तथा आवश्यक परामर्श सेवाको व्यवस्था गरिएको बताइन्।
उनले भनिन्, “एउटा बालबालिका सुरक्षित र शिक्षित हुनु भनेको समग्र समाजको भविष्य सुरक्षित हुनु हो। हामीले संरक्षण गृहमा आश्रय मात्र होइन, पारिवारिक माया, संस्कार र आत्मनिर्भर बन्ने अवसर प्रदान गर्ने वातावरण निर्माण गरेका छौँ।”
संरक्षण गृहमा बालबालिकाको मानसिक तथा शारीरिक विकासलाई ध्यानमा राखी खेलकुद सामग्री, खुला खेलमैदान तथा सिर्जनात्मक गतिविधिका लागि आवश्यक पूर्वाधारसमेत उपलब्ध गराइएको छ।
गाउँपालिकाका प्रमुख प्रशासकीय अधिकृत दिलबहादुर पौडेलका अनुसार संरक्षण गृहमा बसोबास, भोजन, खेलकुद, अनौपचारिक शिक्षा तथा अन्य आधारभूत आवश्यकताहरूको उचित व्यवस्था मिलाइएको छ।
उनले कठिन परिस्थितिबाट आएका बालबालिकालाई सामान्य जीवनमा पुनःस्थापित गर्न स्नेहपूर्ण वातावरण, सीपमूलक शिक्षा र आत्मनिर्भर बन्ने अवसर प्रदान गरिने बताए। साथै, यस्ता बालबालिकालाई समाजको मूलधारमा समाहित गर्न स्थानीय सरकारको प्रयाससँगै समुदाय र समाजका सबै पक्षको सक्रिय सहयोग र अपनत्व आवश्यक रहने उनको भनाइ छ।
Discussion about this post