काठमाडौं कात्तिक १४ गते ।
‘जस्तो कर्म उस्तै फल’ भन्ने उखान नेपाल प्रहरीका सहायक हवल्दार कलिम बेहनालाई लागू भएको छ । नेपाल प्रहरीमा जागिर खाएदेखि प्रहरीको नीति, नियमलाई कुल्चेर पाप कर्म गरेका कलिम अन्ततः लागु औषध ओसार पसार तथा कारोबार गरेको आरोपमा पक्राउ परेका छन् ।
दाङ्ग दरवन्दी भएका उनी पावरको आडमा प्रहरी प्रधान कार्यालयको उजुरी छानविन महाशाखामा काजमा थिए । उनी प्रहरीको आडमा तस्करसँग मिलेर मोटो रकम मात्र उठाएनन् । लागु औषध ओसारपसार तथा विक्रिवितरण गर्न भ्याए । त्यसैले त उनले नेपालगन्जमा गगनचुम्वी घर बनाउन सफल भए । तस्करहरुसँग मिलेर तस्करी समेत गरेका उनले बाँकेको विभिन्न ठाउँमा घडेरी जोडेका छन् ।
सामान्य परिवारका बेहनाको पुख्र्यौली घर बर्दियाको खैरापुर हो । खान, लाउन समस्या भएकै कारण उनी नेपाल प्रहरीमा जवानबाट जागिर खाए । नेपाल प्रहरीमा प्रवेश गरेको केहि वर्षपछि उनले नेपालगन्जका नामुद तस्करहरुसँग राम्रो सम्बन्ध बनाए । भारतबाट अवैध सामान ओसारपसार गराउने गिरोहसँगै उनले लागु औषध कारोवार र ओसारपसार गर्नेहरुसँग हात बढाए । उनका दाई पनि लागु औषध कारोवारी हुन् । लागु औषध ब्यूरोको टोलीले उनका दाईलाई २०८० साल चैतमा लागु औषधसहित पक्राउ गरेपछि उनी अहिले बाँके जिल्ला कारागारमा कैद भुक्तान गरिरहेका छन् ।
खान, लाउन समस्या हुने परिवारका उनीसँग अहिले करीब चार करोडको सम्पत्ति रहेको अनुमान छ । काठमाडौँको कालिमाटी प्रहरी बृत्तमा कार्यरत बाँके जानकी गाउँपालिका घर भएका नेपाल प्रहरीका सहायक हवल्दार रमेश खटिक लागु औषध सहित पक्राउ परेपछि कलिमको कर्तुत बाहिर आएको हो । कलिम र खटिक मिलेर एक सय ५० ग्राम ब्राउनसुगर विक्रि गरिसकेको अवस्थामा बचेको चार ग्राम ब्राउनसुगर सहित पक्राउ गरेको प्रहरी श्रोतले जनाएको छ ।
लागु औषधसहित पक्राउ परेका दुवै जना विरुद्ध मुद्धा चल्ने भएको छ । प्रहरी श्रोतका अनुसार दुवैजनालाई अदालतमा हाजिरी गराएर म्याद थप गरि अनुसन्धान अगाडी बढेको छ । उनीहरुलाई अनुसन्धानका लागि ९० दिनसम्म राखेर अनुसन्धान गर्न सकिने प्रावधान रहेको प्रहरी श्रोतले जनाएको छ ।
पाप धुरीबाट कराउँछ भन्ने उखान कलिमको हकमा लागू भएको छ । लागु औषधसहित पक्राउ परेका सहायक हवल्दारको साविति वयानका आधारमा पक्राउ परेका कलिमलाई नेपाल प्रहरीले निलम्बन गरेको छ । उनी विरुद्ध लागु औषध ओसारपसार तथा विक्रिवितरण ऐन अन्तर्गत मुद्धा दायर गरिने प्रहरीले जनाएको छ ।
कलिम पक्राउ परेपछि नेपालगन्जको जयसपुरका तस्करहरु समेत त्रसित भएका छन् । नेपाल प्रहरीले गहिरो अनुसन्धान गर्ने हो भने कलिमसँगै जयसपुरका नामुद तस्करहरु समेत तानिने भएका छन् । कलिमको सम्बन्ध जयसपुरका तस्करहरुसँग भएकोले धेरै जना लागु औंषध कारोवारीहरुको नाम बाहिर आउने र उनीहरु पक्राउ पर्ने सम्भावना बढेको प्रहरी श्रोतले जनाएको छ । प्रहरीले त्यही ढंगबाट कलिम वेहनासँग बयान लिने काम गरिरहेको छ ।
नेपाल प्रहरीको नाममा घुमुवाको असुली धन्दा, भारतीय नागरिकसँग तीन लाख लुटेको आरोप
Discussion about this post