बाँके पुस १७ गते ।
लागु औषध कारोबार विरुद्धको अभियानलाई बाँके प्रहरीले आक्रामक बनाउँदै लगेको छ । लागु औषध विरुद्धको आक्रामक रुपमा अभियान थालेको बाँके प्रहरीले विहीवार नेपालगञ्ज उपमहानगरपालिका–४ गणेशपुर नजिकबाट लागु औषध कारोवारीलाई पक्राउ गरेको छ ।
लागू औषधको कारोबार भइरहेको विशेष सूचनाको आधारमा खटिएको प्रहरी टोलीले हवाई फायर गरि भारतीय नागरिकलाई पक्राउ गरिएको बाँके प्रहरी प्रवक्ता डिएसपी दीपक पातलीले जानकारी दिए ।
लागू औषध नियन्त्रण ब्युरो र जिल्ला प्रहरी कार्यालय बाँकेबाट खटिएको संयुक्त टोलीले शंकास्पद व्यक्तिलाई खानतलासी गर्ने क्रममा प्रहरीमाथि आक्रमण गरी भाग्न खोजेपछि प्रहरीले ३ राउण्ड हवाई फायर गरी नियन्त्रणमा लिएको उनले बताए ।
पक्राउ पर्नेमा भारत उत्तर प्रदेश, बहराइच जिल्ला, रुपैडिया थाना निवासी ३५ वर्षीय इलिहास अहमद रहेको प्रहरीले जनाएको छ । उनको साथबाट २८० ग्राम १६० मिलिग्राम ब्राउन सुगरजस्तो देखिने लागु औषध बरामद गरिएको उनले बताए ।
पक्राउ परेका अहमदलाई बाँके जिल्ला अदालतबाट ७ दिनको म्याद थप गरी आवश्यक अनुसन्धान अगाडि बढाइएको उनले जानकारी दिए ।
पछिल्लो समय प्रहरी प्रमुख एसपी अंगुर जिसीको कडा निर्देशनमा बाँके प्रहरीले लागु औषध कारोबार नियन्त्रणलाई प्राथमिकतामा राख्दै सशक्त र परिणाममुखी काम गर्दै आएको छ ।
Discussion about this post