बाँके फागुन २१ गते ।
प्रतिनिधिसभा सदस्यको निर्वाचनअन्तर्गत बाँके जिल्लामा शान्तिपूर्ण रूपमा मतदान भइरहेको छ।
मुख्य निर्वाचन अधिकृतको कार्यालय, नेपालगन्जका अनुसार मतदान कार्य उत्साहजनक र व्यवस्थित ढंगले अघि बढिरहेको छ। कार्यालयका प्रवक्ता तथा सहायक निर्वाचन अधिकृत लालबहादुर कार्कीले अपराह्न ३ बजेसम्म करिब ५० प्रतिशत मतदान भएको जानकारी दिए ।
प्रवक्ता कार्कीका अनुसार बिहानैदेखि विभिन्न मतदान केन्द्रहरूमा मतदाताको उल्लेखनीय उपस्थिति देखिएको छ। मतदाता सहज रूपमा मतदान केन्द्रमा पुगेर आफ्नो मताधिकार प्रयोग गरिरहेका छन्। जिल्लाभर मतदान शान्तिपूर्ण तथा सौहार्दपूर्ण वातावरणमा भइरहेको मुख्य निर्वाचन अधिकृतको कार्यालयले जनाएको छ।
मतदान केन्द्रहरूमा युवादेखि ज्येष्ठ नागरिकसम्मको उत्साहजनक सहभागिता देखिएको छ। निर्वाचनलाई सुरक्षित, व्यवस्थित र मर्यादित बनाउन सुरक्षा निकाय तथा निर्वाचनकर्मीहरू सक्रिय रूपमा खटिएका छन्।
बाँकेका प्रमुख जिल्ला अधिकारी दिलकुमार तामाङले हालसम्म कुनै अप्रिय घटना नभएको र मतदान प्रक्रिया सहज रूपमा अगाडि बढिरहेको बताए ।
जिल्ला निर्वाचन कार्यालय बाँकेका अनुसार स्थानीय मतदाताले आफ्नो प्रतिनिधि चयन गर्ने अवसरलाई उत्सवका रूपमा लिँदै उत्साहपूर्वक मतदान गरिरहेका छन्। विभिन्न मतदान केन्द्रहरूमा अझै पनि मतदाताको उपस्थिति उल्लेखनीय रहेको जनाइएको छ।
Discussion about this post