बाँके फागुन २७ गते ।
प्रतिनिधिसभा सदस्य निर्वाचनअघि बाँके जिल्लाका आठवटै पालिकामा मतदाता शिक्षा सञ्चालन गरिए पनि यसपटक पनि बदर मतको सङ्ख्या उल्लेख्य देखिएको छ।
जिल्ला निर्वाचन कार्यालय, बाँकेका अनुसार प्रतिनिधिसभा सदस्य निर्वाचन २०८२ मा जिल्लामा कुल १३ हजार ४४२ मत बदर भएका छन्। ती मत बाँकेको निर्वाचन क्षेत्र नम्बर १, २ र ३ मा बदर भएका हुन्।
यसअघि २०७९ सालको प्रतिनिधिसभा निर्वाचनमा बाँकेमा १५ हजार ३३५ मत बदर भएका थिए। अघिल्लो निर्वाचनको तुलनामा यसपटक केही घटे पनि बदर मतको सङ्ख्यामा ठूलो अन्तर नदेखिएको निर्वाचन कार्यालयले जनाएको छ।
जिल्ला निर्वाचन कार्यालय, बाँकेका प्रमुख टेकबहादुर शाहीका अनुसार जिल्लाका आठवटै पालिकाका ८१ वटै वडामा मतदाता शिक्षा कार्यक्रम सञ्चालन गरिए पनि मतपत्रमा दुई वा सोभन्दा बढी चिन्हमा छाप लगाउने, ल्याप्चे लगाउने लगायतका कारणले धेरै मत बदर भएका हुन्।
उनका अनुसार कतिपय मतदाताले चिन्हभन्दा बाहिर छाप लगाएको, सबै उम्मेदवारका चिन्हमा छाप लगाएको तथा समानुपातिकतर्फ पनि एकभन्दा बढी चिन्हमा छाप लगाएको पाइएकाले मत बदर भएको हो।
मतदाता शिक्षा सञ्चालन गरिए पनि व्यवहारमा त्यसको प्रभाव अपेक्षाअनुसार देखिन नसकेको परिणामबाट स्पष्ट भएको जिल्ला निर्वाचन कार्यालयले जनाएको छ।
निर्वाचन कार्यालयका अनुसार निर्वाचन क्षेत्र नम्बर १ मा खसेको ७४ हजार ९९२ मतमध्ये ४ हजार ८५, निर्वाचन क्षेत्र नम्बर २ मा खसेको ७२ हजार ७ मतमध्ये ५ हजार ३०६ र निर्वाचन क्षेत्र नम्बर ३ मा खसेको ७४ हजार ३१० मतमध्ये ४ हजार ५१ मत बदर भएका छन्।
तीमध्ये सबैभन्दा बढी बदर मत निर्वाचन क्षेत्र नम्बर २ मा र सबैभन्दा कम निर्वाचन क्षेत्र नम्बर ३ मा रहेको जनाइएको छ।
जिल्लामा कुल ३ लाख ५० हजार ३७१ मतदाता रहेकोमा यस निर्वाचनमा २ लाख २१ हजार ३०९ मत खसेको जिल्ला निर्वाचन कार्यालय बाँकेले जनाएको छ।
Discussion about this post