बाँके फागुन २७ गते ।
बाँके जिल्लामा सम्पन्न प्रतिनिधिसभा सदस्य निर्वाचनमा प्रतिस्पर्धा गरेका अधिकांश उम्मेदवारको जमानत जफत भएको छ।
जिल्लामा कुल ५६ जना उम्मेदवार चुनावी मैदानमा रहेकामा ४७ जना उम्मेदवारले जमानत जोगाउन सकेनन्। खसेको कुल सदर मतको १० प्रतिशत मत ल्याउन नसकेका उम्मेदवारको जमानत जफत हुने व्यवस्था अनुसार उनीहरूको जमानत जफत भएको हो।
निर्वाचन क्षेत्र नम्बर १ मा प्रतिस्पर्धा गरेका १४ जना उम्मेदवारमध्ये ११ जनाको जमानत जफत भएको छ। सार्वजनिक मत परिणामअनुसार यस क्षेत्रमा राष्ट्रिय स्वतन्त्र पार्टी (रास्वपा), नेपाली कांग्रेस र नेकपा (एमाले) का उम्मेदवार बाहेक अन्य सबै उम्मेदवारले जमानत जोगाउन सकेनन्।
त्यसैगरी निर्वाचन क्षेत्र नम्बर २ मा २० जना उम्मेदवारमध्ये १७ जनाको जमानत जफत भएको छ। जिल्ला निर्वाचन कार्यालय बाँकेका प्रमुख टेकबहादुर शाहीका अनुसार यस क्षेत्रमा पनि रास्वपा, एमाले र कांग्रेसका उम्मेदवारले मात्र जमानत जोगाउन सफल भएका छन्।
यस्तै निर्वाचन क्षेत्र नम्बर ३ मा प्रतिस्पर्धा गरेका २२ जना उम्मेदवारमध्ये १९ जनाको जमानत जफत भएको छ। यस क्षेत्रमा पनि रास्वपा, कांग्रेस र एमालेका उम्मेदवारले मात्र जमानत जोगाउन सकेका छन्।
यस निर्वाचनमा नेपाल कम्युनिस्ट पार्टी, राष्ट्रिय प्रजातन्त्र पार्टी (राप्रपा) लगायतका दलका उम्मेदवारले समेत जमानत जोगाउन सकेनन्।
प्रतिनिधिसभा सदस्य निर्वाचन ऐन, २०७४ को दफा ७१ अनुसार पहिलो हुने निर्वाचित हुने निर्वाचन प्रणालीअन्तर्गत हुने निर्वाचनमा जम्मा सदर मतको १० प्रतिशतभन्दा कम मत प्राप्त गर्ने उम्मेदवारको जमानत (धरौटी) जफत हुने व्यवस्था रहेको छ।
Discussion about this post