काठमाडौें, असोज २३ गते।
नेपाल कम्युनिष्ट पार्टी (एमाले) बाट निर्वाचित चार जना जनप्रतिनिधिको पद रिक्त भएको छ। निर्वाचन आयोगले असोज २२ गते निर्णय गर्दै उनीहरूको पद रिक्त भएको जानकारी दिएको हो।
पद रिक्त हुनेमा दुई जना उपप्रमुख तथा उपाध्यक्ष र दुई जना वडा अध्यक्ष छन्। उनीहरू २०७९ सालको स्थानीय तह निर्वाचनमा एमालेबाट निर्वाचित भएका थिए।
एमालेको केन्द्रीय सचिवालयले पार्टीको विधानविपरीत कार्य गरी दल त्याग गरेको भन्दै उनीहरूमाथि कारबाही गर्ने निर्णय गरेको थियो। सोही निर्णयसहित पार्टीले निर्वाचन आयोगलाई जानकारी गराएको थियो।
आयोगले राजनीतिक दलसम्बन्धी ऐन, २०७३ को दफा ३२ को उपदफा (१) र राजनीतिक दलसम्बन्धी नियमावली, २०७४ को नियम २२ बमोजिम उनीहरूको पद रिक्त भएको जनाएको छ।
पद रिक्त हुनेमा कोशी प्रदेशको भोजपुर नगरपालिकाकी उपप्रमुख निर्मला शेर्पा र वडा नम्बर ८ का अध्यक्ष नवीन प्रधान छन्।
त्यसैगरी, लुम्बिनी प्रदेशको कपिलवस्तुस्थित विजयनगर गाउँपालिकाकी उपाध्यक्ष लक्ष्मी कुमारी चौधरी र वडा नम्बर ५ का अध्यक्ष अनवर मोहम्मद मुसलमानको पद पनि रिक्त भएको छ।
निर्वाचन आयोगको निर्णयसँगै भोजपुर नगरपालिका र विजयनगर गाउँपालिकाका चार जनप्रतिनिधि पदमुक्त भएका छन्।
Discussion about this post